NLW MS. Peniarth 32 (Y Llyfr Teg) – page 118
Llyfr Iorwerth
118
ỽynt hagen a dylyant y thalu dros eu plant.
neu ỽynteu a|wattont na bo plant udunt.
Rei o|r ygneit a|at y dalu ygyt a|r ỻofrud
y dat a|e vam a|e vrodyr a|e chỽioryd ac eu he+
tiued. kanys hynny o|dynyon a gaffei drae+
an y alanas ef pei ỻedit. ỽrth hynny y talant
ỽynteu ygyt ac ef y traean. ac o hynny y
daỽ ar y ỻofrud deu kymeint ac ar y tat. a|r
tat a|dyly talu deu kymeint a mab idaỽ.
ac a|r vam y daỽ kymeint ac a|r vab idi. Ac
ar y braỽt y daỽ kymeint ac a|r|dỽy chỽiored
idaỽ. ac o|r|hynn a|del ar y ỻofrud. y tal ynteu
kymeint a|deu uab idaỽ. a hynny yỽ kyfreith. hoỽel.
G alanas brenhin aber ffraỽ; yỽ y
sarhaet teir gỽeith. Galanas
gỽreic y brenhin. a|e vab. a|e benteulu. a|e etlig.
a|e nei. Traean galanas y brenhin. ac eu sar ̷+
haet; traean sarhaet y brenhin. Galanas
merch y brenhin; hanner galanas y braỽt.
a|e sarhaet veỻy. kynn y gỽrha. Galanas
y distein a|r kygheỻaỽr. a|r penn·kynyd; naỽ
mu a naỽ ugein|mu gan eu hardrychafel
un·weith. ac eu sarhaet; naỽ mu a naỽ uge+
int aryant gan eu hardrychafel vn·weith.
Galanas pob vn o sỽydwyr y ỻys; chwe|bu
a chỽeugein|mu gan eu hardrychafel vn·weith
| « p 117 | p 119 » |