NLW MS. Peniarth 32 (Y Llyfr Teg) – page 73
Llyfr Iorwerth
73
y|r amdiffynnỽr rodi atteb kynno|e holi o|r haỽlỽr;
bot yn anolo yr atteb yny warandaỽho yr haỽl. ac
odyna atteb. A gỽedy darffo udunt eu dỽy gyg+
haỽssed mal y dywedassam ni uchot; gouynnet
yr ygnat udunt ae|digaỽn a|dywedassant. a|go+
uynnet udunt a vynnant gỽeỻau eu kyghaỽs+
sed. o|r byd a|e mynno. gatter idaỽ. ac ony byd a|e
mynno; kymeret yr ygnat y dỽy gyghaỽssed. a
datkanet ỽy. a gỽedy as|datkanho. aent yr ygneit
aỻan. a|r offeireit. neu yr offeirat. a|r righyỻ y+
gyt ac ỽynt y eu kadỽ rac dyuot ereiỻ y waran+
daỽ arnadunt. O deruyd. y dyn dyuot y warandaỽ
arnadunt ỽy; ef a|dyly talu teir|bu camlỽrỽ y|r
brenhin. ac o|r byd y brenhin yn|y maes; ef a dyly
talu kamlỽrỽ deu·dyblyc. Gỽedy yd eistedont
ỽy yn eu braỽt·le; y mae iaỽn y|r offeiryat gỽediaỽ
duỽ y dangos o duỽ udunt yr iawn. a chanu o+
nadunt ỽynteu eu pader. A gỽedy y pader y
mae iaỽn y|r ygnat datkanu y dỽy gyghaỽssed
eilweith. O|deruyd. bot yn reit ỽrth eir kyfarch; go+
ỻygher deu o|e ouyn. ac o|r byd reit y|r bleit y
gouynner y geir kyuarch idi ỽrth gymryt kyg+
hor; aent ỽy gan ganhat yr ygnat y eu kyg+
hor. ac y·sef niuer yd aant; y niuer y buant yn
eu kyghaỽssed heb a|vo mỽy. a|gỽas yr arglỽyd
gyt ac ỽynt y eu kadỽ. rac|dyuot dynyon y eu
| « p 72 | p 74 » |