NLW MS. Peniarth 36A – page 59r
Llyfr Blegywryd
59r
tho gỽystyl gyt ae varn. pan rother gỽystyl
arall yn| y herbyn. Or mod kyntaf y varn
gamhaf a dileir. Or eil y datgan a iaỽnheir.
Or trydyd y varn heuyt a dileir yna kyt
kyt* boet iaỽn. kany chadarnhaỽyt yn am+
seraỽl trỽy ỽystyl. Os y dadleuỽr a ebryuycca
ymỽystlaỽ a braỽdỽr. nyt amgen. pan y| dat+
ganho gyntaf idaỽ. ny cheiff ym·ỽystlaỽ ac
ef am y varn honno byth gỽedy hynny. kyn
boet kam y varn. yn gyffelyb y hynny. ot
ymỽystla ef yn amseraỽl ac nat ymỽystlo
y braỽdỽr ac ef. y varn a dygỽyd Tri gỽr+
theb yssyd. adef. neu wat. neu amdiffyn.
Nyt cỽbyl vn gỽat hyny talher cỽbyl reith
a perthynho ỽrth y dadyl. na llỽ vn dyn. na
llỽ lliaỽs. LLe y perthyno reith gỽlat. yno y
dyly y brenhin kymell reith·wyr y greir y
tygu yn dylyedus gyt ar gỽadỽr neu yn| y
erbyn ar eu dewis. Reith gỽlat yỽ llỽ deg
wyr a deu vgeint o wyr tiryaỽc dan y| bre ̷+
nhin. y lle ny pherthyno reith gỽlat yno
y dyly y gỽadỽr keissaỽ reith·wyr trỽydaỽ
| « p 58v | p 59v » |