NLW MS. Peniarth 36B – page 8
Llyfr Blegywryd
8
y gan paỽb. paret y kaplan idaỽ
tygu yr creir ac yr allaỽr. ac y wy ̷+
nyeitheit a|dotter ar yr allaỽr na
rotho kam varn byth dan y ỽybot.
nac yr adolỽyn neb. nac yr gỽerth
nac yr karyat. nac yr kas neb. Gỽe ̷+
dy hynny deuent at y brenhin. a
dywedent yr hyn a|wnaethant
ymdanaỽ. ac yny y dyly y brenhin
rodi sỽyd idaỽ or byd bodlaỽn idaỽ
ae lehau y|myỽn eistedua dylyetus.
ac yna y dylyir rodi ouertlysseu
idaỽ. Taỽlbord y|gan y brenhin. A
motrỽy eur y|gan y vrenhines.
ac na rodet ac na werthet y rei
hynny byth. Ny dyly neb bot yn
vraỽtỽr namyn y|neb a dyscer
ual hynny neu a uo kyfarwyd
y|myỽn kyfreith a|tygho val hỽn ̷+
nỽ na barnho kam yn|y vywyt.
| « p 7 | p 9 » |