Cardiff MS. 1.362 (Hafod 1) – page 83r
Brut y Brenhinoedd
83r
arderchaỽc oed dinas kaer llion o deucant yscol ac ythra+
on da yn kanu yndunt amryualyon geluydodeu. A
chymein a parattoet yna o armerth ac a|oed teilỽc y ryỽ
wled honno. Ac yna yd anuonet y po* gỽlat o a waryscyn+
nasse arthur y waỽd* y brenhined ar|tywyssogyon ar ier+
ill ar barỽneit ar marchogyon urdaỽl ar gỽyrda y gym+
ryt eu iaỽn ac eu dylyet. Ac yna y doethant ỽrth y wys
honno. Aron vab kynuarch brenhin yscotlont. ac vryen
vab kynuarch brenhin reget. A kyswallaỽn llaỽhir bren+
hin gỽyned. Meuruc vrenhin dyuet. a chadỽr. vrenhin. ker+
nyỽ. A thri archescob yny* prydein. archescob llundein
ac archescob kaer efraỽc. A dyfric archescob kaer llion.
A hỽnnỽ a oed jeuaf. a legat dan pab rufein. Ac y am
hynny tywyssogyon y trefyd maỽr bonhedic. morud
iarll kaer loyỽ. Mor iarll kaer wrangon. a maraỽt
o a·mỽythic. Marthrut o gaer weir. yr hon a|elwir
warwic. ywein o gaer lleon. kynuarch o gaer geint
Gỽallaỽc o salysberi. vryen o kaer vadon. Jonatha
o dorgestyr. bosso o ryt ychen. dunaỽt vab pabo post
prydein. kene vab koel. predur vab rud. Gruffyd vab
vognet. Rygyn vab klaỽd. Edelyn vab coledaỽc. kyg+
gar vab angaỽ. Massen cloffaỽt. Run vab noethon.
kynuelyn vab trunyat. kariel vab kadell. kynllith
vab noethon. Ac y gyt a hynny llawer o wyrda a oed
reir* y datgan. ac o|r enyssoed y doeth yno gillamỽ+
ri vrenhin iwerdon. Gillamỽri brenhin islont. dol+
dan vrenhin gotlant. winwas brenhin orc. lleỽ vab
kynuarch brenhin llychlyn. Echel vrenhin den·marc.
a* o ffreinc y doeth hotlun tywyssaỽc rỽytun.
| « p 82v | p 83v » |