BL Harley MS. 958 – page 4r
Llyfr Blegywryd
4r
troi y golỽẏth kẏntaf hẏt pan dotter ẏ|di+
wethaf ger bron ẏ brenhin a|r vrenhines.
Naỽd ẏ troedaỽc ẏỽ o|r pan dechreuho eisted
dan draet ẏ brenhin hẏt pan el ẏ staueỻ.
Naỽd ẏ medic ẏỽ o|r pan el o arch ẏ bren+
hin ẏ ofỽẏ ẏ claf o|r ỻẏs. hẏt pan del ẏ|r llẏs
dracheuẏn. Naỽd ẏ guastraỽd brenhines.
kẏffelẏp ẏỽ ẏ naỽd guastraỽd brenhin.
Naỽd ẏ kẏnudỽr ẏỽ hẏt ẏ lle peỻaf ẏd el
y genuta. a chẏmeint ac a aỻo ẏ uỽrỽ a|e
vdẏf. Y porthaỽr a|r kẏnutei nẏt ẏttẏnt o
rif ẏ pedwar sỽẏdaỽc ar|hugeint. Kẏn no
hẏn ẏ diwespỽyt am noduaeu ẏ pedwar sỽẏ+
daỽc ar hugeint. pỽẏ|bẏnnac o·honunt ẏ tor+
rer ẏ naỽd. neut sarhaet idaỽ. O medegin+
aeth ẏ medic ỻẏs neb vn brathedic o wẏr
ẏ llẏs hẏt pan uo iach. ẏ waetwisc a geiff
ef a|r tudedẏn uchaf ẏ|r brenhin ban ẏm+
welho gẏntaf ac ef. Am ẏ noduaeu ẏ|dẏwes+
pỽẏt gẏn no hẏn. weithon ẏ dẏwedỽn beth
a dẏlẏir ẏ dalu dros sarhaet paỽb a|e werth.
Sarhaet penteulu ẏỽ traẏan sarhaet ẏ
brenhin. a phob vn heb eur a heb arẏant.
Sarhaet pob vn o|r rei hẏn ẏỽ nẏt amgen.
Distein. Penkẏnẏd. Pengỽastraỽt. Braỽ+
dỽr ỻẏs. Hebogẏd. Gwas ẏ·staueỻ. Morỽyn
| « p 3v | p 4v » |