Oxford Jesus College MS. 119 (The Book of the Anchorite of Llanddewi Brefi) – page 98v
Buchedd Dewi
98v
ac auon a|oed y|tu ar deheu. yr aỽr y kymerth hi y
bara yn|y gyluin hi a|syrthaỽd o|r prenn yn|varỽ
yr llaỽr. Y|tryded rann o|r bara a gymerth deỽi.
ac a|e bendigaỽd ac a|e bỽytaaỽd. Sef a|ỽnnaeth yr
holl vrodyr edrych arnaỽ a|ryuedu yn|vaỽr ac
ofuynhav yn ormod am deỽi. Ac yna y|menegys
deỽi y|damỽein yr holl vrodyr mal y|mynnassei y
tỽyllỽr y|ỽenỽynaỽ. Ac yna y|rodes yr holl|vrodyr
eu hemelltith ar|y gỽyr hynny. Ac ygyt a|hynny
rodi ar|y|tat o|r nef hyt na cheffynt hỽy yn dragyỽy+
daỽl gyurann o|teyrnnas nef. A gỽedy kadarnn+
hav ffyd a chret yn|yr ynys honn. holl lauurỽyr
yr hynys* honn a|deuthant ygyt hyt yn dor sened
vreui ar escyb. ar athraỽon ar offeireit. ar|brenhi+
ned ar tyỽyssogyonn. ar ieirll. ar|barỽneit. ar
goreugỽyr. ar ysgỽiereit. ar kreuydỽyr yn llỽyr
a|phaỽb heb allu rif arnadunt a|ymgynnullassant
y|sened vreui. ac amot a|ỽnaethpỽyt yn|y gynnu+
lleidua honno. pỽy|bynnac o|r sened o|r|seint a|prege+
thei val y|clyỽei y|niuer hỽnnỽ yn gyffredin. gadv
ohonunt yn bennadur ar seint ynys prydein. Ac
yna y|dechreuaỽd y|seint bregethu bop eilỽers. Ac
yna y|dyỽat vn dros y|kyffredin. y kannvet dyn o|r
gynnulleidua honn heb ef. ny|chlyỽ dim o|r bregeth.
Yr yỽch yn llauuryaỽ yn ouer o gỽbyl. Yna y|dyỽat
| « p 98r | p 99r » |