Oxford Jesus College MS. 57 – page 48
Llyfr Blegywryd
48
meint a|dal pob vn a|e gilyd. ac ueỻy o|r gỽra+
ged. dyeithyr na thal gỽreic. namyn kymeint
a|hanner rann gỽr. Y rann gyntaf honno y
vam a|e dat a|e vrodyr a|e chỽioryd y neb a|lader
y telir. a|e sarhaet ueỻy kany ledir neb heb y
sarhau. Y dỽy rann a|dodet o|r dechreu ar gene+
dyl y ỻofrud a|rennir yn|deir rann. y dỽy rann
ar genedyl y tat. a|r dryded ar|genedyl y vam
Y kyfryỽ gereint a|dalont alanas y·gyt a|r ỻof+
rud. y kyffelybyon o·blegyt y dyn a ladher a|e
herbynyant o|r gorengaỽ* hyt y gorchaỽ.
Ual|hynn yd enwir achoed kenedyl a|dylyont
talu galanas. neu gymryt tal. Kyntaf
ach o|r naỽ tat a mam y ỻofrud neu y
ỻadedic. Eil yỽ. hendat. Trydyd yỽ gorhendat.
Pedwyryd yỽ. brodyr a|chỽioryd. Pymhet yỽ
keuynderỽ. Chỽechet yỽ kyverderỽ. Seith+
uet yỽ kyfnyeint. Wythuet yỽ. gorchnyeint*.
naỽ·uet yỽ gorchaỽn*. aelodeu yr achoed hynny
ynt. ny·eint ac ewythred y ỻofrud. neu y ỻadedic.
| « p 47 | p 49 » |