NLW MS. Llanstephan 27 (The Red Book of Talgarth) – page 33v
Ymborth yr Enaid
33v
an knaỽt ni ymdanaỽ ac a|gahat o|r yspryt glan. ac a anet
o|veir wyry. ac|herwyd hynny yn braỽt ni yỽ ef. kyt boet duỽ
dat yn dat ynn. a|r yspryt glan yn|dat·maeth ynn. kanys
y garyat ef yỽ ymborth yn heneidyeu ni. ac ueỻy y dywetpỽ+
yt y|r braỽt yn|y vreudwyt. Kanys ual yd oed neb·un vraỽt o
grevyd brodyr pregethwyr yn|y benyt. ac yn|dodi y hoỻ obe+
ith yn|y drindaỽt o nef. ac o hoỻ ewyỻys y gaỻon yn gnottau
yn|y vedỽl yn vynych cussanu traet pob vn o|r teir person ar
neiỻtu. yn vn wed a|phei|beynt gyndrycholyon rỽng y dwy+
laỽ. Ac yn hynny dydgỽeith y boredyd yn|y varỽ·hun ef a|glyei*
lef arafber garueiddlos yn dywedut ỽrthaỽ ual hynn. Da ia+
ỽn y gỽney di yn karu ni bop person ar neiỻtu. ac eissyoes
kanys anhaỽd yỽ ytti deaỻ traet y tat neu yr yspryt glan
na|e hadnabot. ỽrth hynny ymdiriona di yn|garedic a|r mab
ac ymgar ac ef. kanys ohonaỽch chỽi yd hanyỽ ef. a|throssa+
ỽch y ganet. ac y godefaỽd. ac a|wnelych di yrdaỽ ef. kymere+
dic yỽ gennym ni. ac ynni y gỽney megys idaỽ ef. kanys un
ym ni ac ef yn tri y·gyt. Ac odyna glutwediaỽ a|oruc y braỽt
yn serchaỽl garedic y|drindaỽt o|nef y ardangos idaỽ peth
kadỽatwy trigyedic yn|y tragywydaỽl gof am y gỽynvyde+
dic dwywaỽl vendigeituab hỽnnỽ. drỽy ymdiret yn gadarn y|r
drindaỽt ar gaffel y ganthaỽ yr hynn a archer yn|drut idaỽ
ac yn gyfyaỽn drỽy deilỽng wedi. A gỽedy ỻithraỽ talym o
amser gỽedy hynny yny doeth gỽyl y drindaỽt yn yr haf.
Yna y boredyd gỽedy bot y braỽt yn glutwediaỽ y drindaỽt
wedy pylgeint y brodyr yny vu dyd. a|r braỽt yna gỽedy y
ry oỻỽng o|e benyt yr ys|talym kyn·no hynny. Yna y boredyd
| « p 33r | p 34r » |