NLW MS. Llanstephan 27 (The Red Book of Talgarth) – page 96v
Mabinogi Iesu Grist
96v
ef a|dywaỽt. Ehedỽch ar|hyt yr hoỻ vyt ac amylheỽch. A|phan
weles paỽp yr arỽydon hynny y crynassant ỽynteu. a moli
duỽ a|wnaethant gan ryuedu hynny. ac ereiỻ a|oed yn
murmur o·dieithyr am·danaỽ. ac yna rei o·honunt a|aeth
att tywyssogyon yr offeireit. a menegi udunt gỽneuthur
o Jessu uab Joseph ỻawer o betheu en·ryued yng|gỽyd pobyl
yr israel. Ac yna y menegit hynny y deudec|ỻỽyth yr israel.
Ac yna eilweith mab anna offeirat y demyl yr|hỽnn a|doeth
kynno hynny a gỽialen yn|y laỽ. a phaỽp o|r bobyl yn edrych
yn ỻidiaỽc arnaỽ. hỽnnỽ a torres h·yttynt y dỽfyr a|warcha+
yssei Jessu. ac ef a|e goỻyngaỽd yn vn readyr. a phan weles
Jessu hynny. ef a|dywaỽt ỽrth y mab a oỻyngassei y ỻynnev.
O waethaf hat yr ennwired. O uab angeu. O weithret kyth+
reul ennwir. ffrỽyth dy hat|ti bit heb rym. a|th wreid heb w+
lybyr. a|t* geingeu yn wyỽ heb dỽyn dim ffrỽyth. ac yng|gỽyd
paỽp. gogỽydaỽ a wnaeth y mab ac heb o·hir marỽ. Odyna
y kymerth ioseph iessu. ac yd aeth ac ef adref. a|e uam y+
gyt ac ef. a ỻyma yna yn|dyuot yn diessyfyt mab dan redec
yn|y wrthỽyneb a lauuryaỽd enwired yndaỽ. ac yn taraỽ y
ysgỽyd ỽrth ysgỽyd iessu yr mynnu argywedu idaỽ. a Jessu
yna a|dywaỽt ỽrthaỽ. nyt ymchoely di o|r|fford yr ỽyt yn my+
net. ac yn|diannot y syrthyaỽd y mab hỽnnỽ yn varỽ. Yna
y gỽaedassant rieni y mab marỽ yn edrych ar|hynny gan
dywedut. Pa|du y ganet y mab hỽnn. amlỽc yỽ pob peth
o|r a|dywetto ef. a|r hynn a vynno ef a gyflenwir. Yna y dy+
nessaỽd rieni y mab marỽ. att ioseph ac y dywedassant ỽrth+
aỽ. Joseph heb ỽynt. dos ymeith. a Jessu gennyt. kanys
| « p 96r | p 97r » |