NLW MS. Peniarth 11 – page 240v
Ystoriau Saint Greal
240v
oed yn|y byt y gyn|gasset ganthaỽ. A|e vedỽl oed ar|dial y dat
arnaỽ os gallei. Ef a|doeth diwarnaỽt gyuerbyn a chaer|ỻion
ar y decuet o varchogyon urdolyon yn aruaỽc o bop arueu. ac
a|gynnullassant yr anreithyeu y·rỽng kaer|ỻion a|r|fforest.
Laỽnslot yna a|doeth aỻan ar y seithuet o|r marchogyon goreu
o|r casteỻ. ac yn ol y|rei a|oed a|r anreith ganthunt y doeth ef.
a|r kyntaf a gyfaruu ac ef onadunt ef a|e trewis yny vyd y
waeỽ trỽydaỽ. a|r marchogyon ereiỻ a|torres eu pelydyr ar
y ỻeiỻ. ac ueỻy ymguraỽ a|wnaethant yny syrthyaỽd y·rỽng
pob tu a|e gilyd pedwar y|r ỻaỽr yn veirỽ. ac ef a vriwyt ỻaỽ ̷+
er. Elinaus o|r ty atueilyedic a arganuu laỽnslot. ac a vu
lawen ganthaỽ hynny. ac a|e trewis yn|y daryan yn gyn|ffes+
tet ac yny vyd y gỽaeỽ yn|dryỻeu yỽch y benn. a|laỽnslot a|e tre+
wis ynteu yng|kedernyt y|daryan yny orvu arnaỽ ef ymo+
vyn pedrein y varch ac y|r|ỻaỽr yn wysc y benn a|e|draet yn
vchaf. ac yna laỽnslot a vynnassei disgynnu ar vedyr y daly.
pan|doeth briant o|r ynyssed a chedernyt maỽr ygyt ac ef. a
pheri idaỽ esgynnu drachevyn ar y varch. yr ymlad a|dỽbla+
ỽd o bop parth gan varchogyon yn dyuot o|r|greic calet. ac o
gaer ỻion. yny glywit y pelydyr yn torri. a|r dyrnodeu yn am+
yl gan y cledyfeu. ac ar hynny laỽnslot a briant a ymgyrchas+
sant yn greulaỽn. yny ytoed eu gỽaewyr yn tyỻu eu tary+
aneu a|e ỻurygeu. a|phenneu eu gỽaewyr yn ymgyhỽrd a|e
knaỽt. a|r gỽaewyr yn dryỻyaỽ ac yny vyd eu corffeu ygyt
| « p 240r | p 241r » |