NLW MS. Peniarth 11 – page 6r
Ystoriau Saint Greal
6r
mi a|ỽnn vot pererindaỽt seint greal yn|dynessau. a|chan gỽnn
inneu hynny yn ỻe|gỽir. ac na|bydỽch chwitheu yn gyn gỽ+
plet ygyt ac yr yttyỽch hediw. ac ỽrth hynny yd ỽyf inneu yn|adolỽc
chỽi darparu a gỽneuthur ryỽ dỽrneimeint megys y gaỻer
ymdidan am·danaỽ gỽedy ni. a chyttuunaỽ y·gyt ar hynny
a|wnaethant. a|dyuot y|r dinas a|chymryt a|chymryt eu har+
ueu a|orugant. ac ny pharassei y brenhin udunt ỽy hynny
dieithyr yr gỽybot a gỽelet peth o deỽrder galaath a|e vilỽry+
aeth. a|thybyeit heuyt na|deuynt y·raỽc dracheuyn. a|gỽe+
dy. A gỽedy eu|dyuot y|r weirglaỽd hoỻ niuer y ỻys a|maỽr
a|bychan. y|gỽisgaỽd galaath y arueu drỽy eiryaỽl y bren ̷+
hin a|r vrenhines. ac arthur a|gynigyaỽd taryan idaỽ ac
ny|s mynnaỽd. Gỽenhỽyvar a|e morynnyon y ar vann y
gaer yn|edrych ar·nadunt. Ac yna galaath a|dechreuaỽd ym+
wan a milwyr y vort gronn. a thorri pelyr*. a|ỻavuryaỽ
o|e nerth yn gymeint ac nat oed ymdidan am neb namyn
am·danaỽ ef e|hun. Ac erbyn pryt gosper nyt oed neb o
vilwyr y vort gronn heb idaỽ eu|bỽrỽ oỻ y|r ỻaỽr namyn
gwalchmei a|laỽnslot a pheredur. Ac yna arthur a|beris
y baỽp peidyaỽ a|r|gỽareu hỽnnỽ rac tyuu kywryssed y ̷+
ryngthunt. ac erchi y alaath diosgyl y helym a|e dỽyn y|r
dref o|e vlaen. Ac ueỻy y kerdassant drwy y dinas yny
doethant y|r ỻys. a phan welas y vrenhines galaath yn dy+
uot. hi a|dywaỽt yn|diheu panyỽ mab oed ef y laỽnslot.
a disgyn y waeret a|oruc hi. a|mynet ygyt y warandaỽ
gosper a|orugant. a gỽedy gosper ỽynt a|doethant y|r ỻys
| « p 5v | p 6v » |