NLW MS. Peniarth 32 (Y Llyfr Teg) – page 210
Llyfr Iorwerth
210
O|deruyd barnu reith ar|dyn am ledrat a|hynny
o wyr not. a chyn dyuot oet y reith marỽ un
o|r gỽyr not. a|thebygu o|r coỻedic bot yn odor
hynny arnaỽ; kyfreith. a|dyweit nat godor yn vn ỻe
y ỻesteiryo agheu. o·nyt yn|dyd coỻ neu gael.
neu yn ỻe yd adaỽho dyn gỽybydyeit o|e dauot
e|hun. yn|y deu le hynny o|r byd marỽ gỽybyd+
yeit kyn·no|r oet; godor yỽ arnaỽ. kanys ef
e|hun a|edewis ar|ny aỻaỽd y gaffel. Hynn o
agheneu a|oetta kyfreith. yn diodor. nyt amgen. ag+
heu. a heint gorweidaỽc. neu vriỽ. neu vrath
ny aỻo nac ar varch. nac ar troet. neu na bo
hydrum idaỽ y wlat nac idaỽ nac o|e|gennat.
neu uordỽy o achaỽs gỽeilgi. neu gam·wynt
y·rygthaỽ a|e edyl. neu garchar kynnogyn.
neu aghen arglỽyd. neu na ry glyỽho y dy+
uynnu. Pob vn o|r rei hynn; nyt o bleit yr
amdiffynnỽr y maent yn ỻesteiryaỽ. namyn
eu bot yn|agheneu gossodedic yg|kyfreith. ac ỽrth
hynny nyt ymchoelant ỽynteu ar y neb y bo
dadleu arnaỽ. Ny dyly arglỽyd herwyd kyfreith. dim
o|da dyn a|dihenydyo am|ledrat. nac o|da y wre+
ic a|e ueibyon; hyt yn oet pedeir blỽyd ar|dec. na
dim namyn eneit y dyn a|dihenydyo Hynn
o betheu yssyd vn vreint a ỻedrat yn ỻaỽ. o|r
byd dyn yn kerdet ford. a chaffel ysgrybyl
| « p 209 | p 211 » |