NLW MS. Peniarth 46 – page 194
Brut y Brenhinoedd
194
ant yd ellygỽyt y|brenhin. a gỽedy
gỽelet o ỽrtheyrn y|truan aerua honno
gann yr ysgymun bobyl. kilyaỽ a|ỽnaeth
ef parth ac emylheu kymry. Cany ỽy ̷+
dat beth a|ỽnaei yn erbyn y saesson.~
a galỽ attaỽ a|ỽnaeth holl doethyon y de ̷+
yrnas a gouyn vdunt beth a gynghorent
idaỽ. ac y kyghoret idaỽ adeilat castell
yn|y lle cadarnnaf a|gaffei
megys y|bei hỽnnỽ yn amdiffyn idaỽ
cann collassei oll y|lleoed cadarn o|e gy ̷+
uoeth. a gỽedy crỽydraỽ y|geissaỽ y ryỽ
le hỽnnỽ o|r diỽed y doeth hyt y|mynyd
eryri. a gỽedy cael lle bu adas gantaỽ.
gỽneuthur y|castell. kynnullaỽ a|ỽnaeth+
pỽyt holl seiri mein o|r|a allỽyt y|cael
ỽrth y|dỽyn hyt yno. a gỽedy gossot
y grỽndỽal onadunt kymeint ac a
a*|ỽnelynt y|dyd o|r gỽeith. trannoeth
y|daruydei y|r dayar y|lyncu hep ỽybot
dim y|ỽrthaỽ. a gỽedy menegi hynny
| « p 193 | p 195 » |