NLW MS. Peniarth 46 – page 46
Brut y Brenhinoedd
46
A C yn ol brutus y|doeth lleon y|vab yn+
tev. Gỽr a|garỽys hedỽch uu hỽn+
nỽ. a gỽedy gỽelet ohonaỽ y kyf+
uoeth yn tagneuedus yd adeilaỽd dinas
yg gogled yr ynys honn. ac y|gelỽis o|e
enỽ e|hun caer lleon. ac yn diỽed y oes
y llesgỽys. a|r amsser hỽnnỽ y|dechreuis
selyf vab dauid adeilat temyl yg|kaerus+
salem. ac y doeth brenhines saba y|wa+
randaỽ yd* doethineb. ac yna val y|dyỽet+
pỽyt vchot gỽedy llescu lleon y|kyuodes
teruysc y·rỽg y kyỽdaỽdỽyr e|hun.
A gỽedy marỽ lleon y|doeth Run ba+
ladyrvras y|vab yntev yn vrenhin.
ac vn vlỽydyn eisseu o|deugein y|bu yn
gỽledychu. a hỽnnỽ a|duc gỽyr y|r|ynys
ar duundeb. ac a adeilỽys kaer keint
a chaer ỽynt. a|chaer vynyd paladyr
yr honn a elỽir yn aỽr caer septon lle
y bu yr eryr yn dyỽedut daroganheu y+
tra adeilỽyt y|gaer. ac yn|yr amser
| « p 45 | p 47 » |