NLW MS. Peniarth 9 – page 3r
Ystoria Carolo Magno: Chronicl Turpin
3r
lỽ y bu dyn yr hỽn a uu duỽ. ny ỽn ni dim o+
honaỽ. yr hỽn a wnaeth nef a dayar heb
y rolond ac a|greỽys pob peth o dim. euo a wy+
nayth y uab yn dyn yn|y wyry heb defnyd
gỽraỽl namyn o|y gyssegredic yspryt ef.
Yn hyny y llauuryaf vi heb y kaỽr pa delỽ
heb gyt gỽr y genit mab o wyry mal y dy+
wedy di. Duỽ heb y rolond yr hỽn a|ffur+
uaỽd adaf heb gyt gỽr a gỽreic. ynteu a wy+
nayth geni y vab y hun o|r wyry heb gyt
gỽr. Ac val y ganet adaf heb vam o duỽ tat.
val hyny y ganet y vab ynteu o vam heb
dyn yn tat. Canys y ryỽ anedigaeth honno
a weda y duỽ. Diruaỽr gewilyd yỽ gennef
vi heb y kaỽr pa|delỽ y genit o wyry heb dyn.
Yr hỽn heb y rolond a wna y pryuyn y my+
ỽn y ffaen. ac a wna tyuu pryf creadur y
myỽn y pren. A|llawer o|byscaỽt ac adar a
gỽenyn a nadred heb gyt gỽryỽ. ynteu a
wnaeth yr vorỽyn wyry heb gyt gỽr geni
duỽ a dyn. Canys y neb a wnayth y dyn
kyntaf mal y dywedeis i. yn haỽd heb neb
ryỽ gyt dyn; Haỽd y gallỽys ynteu wne+
uthur geni y vab ynteu o|r wyry heb gyt
gỽraỽl. Ef a allei heb y kaỽr y eni o|r wy+
ry. ac os mab duỽ eissoes yỽ ef mal y dy+
wedy di. ny allei varỽ o neb ryỽ vod cany
byd marỽ duỽ byth. Da y dywedy heb y
rolond. gallu o·honaỽ geni o|r wyry. A cha+
| « p 2v | p 3v » |