Bodorgan MS. – page 53
Llyfr Cyfnerth
53
gỽr a march a bỽell ar treul y brenhin y wneuth+
ur y luesteu. Tri pheth ny werth tayaỽc heb
ganhat y arglỽyd. march. a moch.
a mel. Os gỽrthyt y arglỽyd gyssefin; gỽerth ̷+
et ynteu yr neb y mynho gỽedy hynny. Teir
keluydyt ny dysc tayaỽc y vab heb ganhat y
arglỽyd. yscolheictaỽt. a bardoniaeth. A gofy ̷+
anaeth. kanys o|r godef y arglỽyd hyny roder
corun y yscolheic neu hyny el gof yn| y eueil.
neu bard ỽrth y gerd. ny ellir eu keithiwaỽ.
gỽedy hynny. O|r ymladant gỽyr escob neu
wyr abat a gỽyr y brenhin ar tir y teyrn; eu
dirỽy a daỽ yr teyrn. A chyt ymladont gỽyr
escob a gỽyr abat ar tir y brenhin; brenhin a
geiff eu dirỽy. Y neb a artho tir dros lud ar ̷+
glỽyd; talet pedeir keinhaỽc kyfreith am ago ̷+
ri dayar gan treis. A phedeir keinhaỽc kyfre ̷+
ith o diot heyrn o|r dayar. A cheinhaỽc o pop
cỽys a ymchoelho yr aradyr a hynny y perch ̷+
ennaỽc y tir. kymeret yr arglỽyd yr ychen
oll ar aradyr ar heyrn. A gỽerth y troet deheu
dy*|r amaeth. A gỽerth y llaỽ deheu yr geilwat.
O|r clad dyn tir dyn arall yr cudyaỽ peth yn ̷+
daỽ; perchennaỽc y tir a geiff pedeir keinhaỽc
| « p 52 | p 54 » |