NLW MS. 24029 (Boston 5) – page 147
Llyfr Blegywryd
147
atteb. A naỽ ẏ rodi mach. A naỽ ẏ rodi gỽir
o|r haỽl deissẏuedic. Haỽl ẏn vn gantref;
tri dieu ẏ|rodi atteb. A|thri ẏ|rodi mach.
A|thri ẏ|rodi gỽir. Ynn|ẏ cantref nessaf;
pẏm nieu ẏ|rodi atteb. A phẏmp ẏ|rodi
mach. A phẏmp ẏ|rodi gỽir. Ẏnn|ẏ can+
tref trẏdyd; naỽ nieu ẏ|rodi atteb. a|n ̷+
aỽ ẏ rodi mach. A naỽ ẏ|rodi gỽir. Oet
ar·waessaf ẏn vn gẏmỽt. neu ẏn vn g+
antref. tri dieu. Os ẏn arglỽẏdiaeth ar ̷+
all ẏn agos. naỽ nieu. Ac nẏ|dodir teru ̷+
ẏn nac ar duỽ sul nac ar|duỽ llun. Oet
ar·waessaf ẏ|gwlat arall; neu am|dỽfẏr
maỽr. neu am lanỽ. pẏtheỽnos. ac nẏt
mỽẏ. Petỽar agkẏuarch gỽr ẏnt;
ẏ varch. a|e arueu. a|thỽnc ẏ|tir. a|e wẏ ̷+
nebỽerth. Penkenedẏl bieiuẏd pob sỽ+
ẏd o|r a|uo ẏ|r genedẏl. Ac o|r|dẏrẏ sỽẏd
ẏ vab idaỽ. neu ẏ gar. punt a|dẏrẏ ef ẏ|r
arglỽẏd. Ac o|rydha vn ohonunt heb
rodi sỽẏd idaỽ; wheugeint a|drẏrẏ|hỽ ̷+
nnỽ ẏ|r arglỽẏd. NẎt oes ẏmpob dad+
leu onnẏt petwar peth. Gỽẏs. A|haỽl.
Ac atteb. A|barn. Penkenedẏl punt a ̷
dẏrẏ ẏnn|ẏ vlỽẏdẏn ẏ|r arglỽyd. Pob
| « p 146 | p 148 » |