BL Cotton Cleopatra MS. B V part i – page 126r
Brenhinoedd y Saeson
126r
vynyd Guldedwn. ac ef a doeth yn ev herbyn
hyt yn Guldeforde ac anvon gwyr arvauc
yn ev herbyn. ac erchi ydunt lle gweleint y
mynyd vchaf plannv kyff yn y daear a gys+
sot y meibion bonhedigion o normandi y
eiste yn amgilch y kyff. a rwymaw elvredus
wrth y kyff yn ev perved. a ssevyll o|r gwyr ar+
vauc yn amgilch y meibion. ac ev cledyfev
noetheon yn ev llaw. a degymmv y meibion
a llad penn y decvet tra gellit ev degymmv.
A gwedy na ellit; erchi tynnv ev llygeit a
llad ev trwynev. ac ev clustiev. ac ev gweus+
sed. ac ev tafodev. ac ev dwylav. ac ev traet.
ac ev crogi wyntev. Ac odena dinoethi elured
a rwymaw y dwylaw dra y|gevyn y am y post.
A thynnv pennev y goludeon ford y vogel allan.
ac ev festinghiaw a hoylion heiern yn|y kyff.
a|y droi yntev yn wisc y ystlys yny vythei y holl
coludyon gwedy yr droi yngchylch y kyff me+
gys raf. Ac erchi ydunt na ettyt yr vn y di+
anc onadunt rac ymliw geir bron y brenhin
ry lad o·honaw yn|y mod hwnnw y vraut. ny
didorei yntev y oganv am y weithret honno. ca+
nys tybiaw a wnay na chredit. Ar gwyr creulon
a wnaethant o gwbyl; megis yd erchis y creulon
arall ydunt. canys y brenhin a oed glaf. A chet
ys meneckyt ydaw ny allei namyn tewi rac
cadarnhet Gotwin. Ac yn lle gwedy hynny y|bu
varw hardechnout yn lamhiche yn ymyl llvndein;
| « p 125v | p 126v » |