BL Harley MS. 4353 – page 41r
Llyfr Cyfnerth
41r
a deu vgeint y wadu coet a maes. A thri o+
honunt yn diofredaỽc. o gic. a gỽreic. a mar ̷+
chogaeth. Sef yỽ messur gỽadu coet a| ma ̷+
es. rantir kyfreithaỽl rỽg rỽyd a dyrys a ch ̷+
oet a| maes a gỽlyb a sych. Ac ar ny allo gỽa ̷+
du rantir yn gyfreithaỽl. ny dichaỽn gỽadu
coet a maes. Ny byd kynllỽyn ynteu o|r
byd ar fford gyfreith heb gud a heb gel ar ̷+
naỽ. O|r byd ynteu dros y fford pump kam
kyfreithaỽl. A phump troetued ym
pop kam; kynllỽyn uyd. A llyna yr achaỽs
y| gỽedir velly. Ac y telir yn deudyblyc. A lly ̷+
na yr vn lle y dylyir croc ac anreith ymdanaỽ.
SEith escob·ty yssyd yn dyfet. A mynyỽ
yỽ y penhaf yg|kymry. llan ismael.
a llan degeman. A llan vssyllt. A llan Teilaỽ.
A llan teulydaỽc. A llan geneu. Abadeu tei ̷+
laỽ A theulydaỽc Ac ismael A degeman a| dy ̷+
lyant vot yn yscolheigon vrdolyon. Deudec
punt yỽ ebediỽ pop vn o hynny ac y arglỽ ̷+
yd dyuet y telir. A|r neb a del gỽedy ỽynt a|e
tal. Ryd yỽ mynyỽ o pop dylyet. llan keneu
A| llan vssyllt ryd ynt o|r dylyet hỽnnỽ kanyt
oes tir vdunt. Y neb a| sarhao vn o|r abadeu
hynny; talet seith punt idaỽ. A golchures
o|e genedyl yr gỽaratwyd y|r genedyl Ac yg kof
y dial.
| « p 40v | p 41v » |