Oxford Jesus College MS. 119 (The Book of the Anchorite of Llanddewi Brefi) – page 115v
Ystoria Adrian ac Ipotis
115v
y|mae yn eisted ar|dehev duỽ tat hollgyfuoethaỽc.
yn duỽ gỽir ac yn|ỽir dyn. Ac odyno y|mae yn
barnv. Ac y|daỽ dydbraỽt y varnnv ar|baỽp her+
ỽyd y|ỽeithret priaỽt. Ac yna fol vyd y|neb nyt
ofuynnhao. Ac ny bo brethychus erbyn y|dyd hỽn+
nỽ. y cristonogyon buchedaỽl a|ant yr lleỽenyd.
Ar rei ereill drỽc eu ffyd a|ant yr poenev. heb yr
amheraỽdyr llyma dillygdaỽt tec. Oia vab synn+
hỽyryaỽl heb ef py bỽnc y|tỽyll y|kythreul dyn
bydaỽl. Ac y|harỽed yr eneideu y vffernn. y|mab a
dyỽat y|mae seith pechaỽt a|lluossaỽc ynt ym
plith y knaỽdaỽl dynyon. kynntaf yỽ ohonunt
medỽl drỽc yg|kallonn dyn. A|r eil yỽ llad kalaned
yn ỽiryon. A|hynny a|dỽc dyn y|myỽn honnediga+
eth drỽc keỽilydyus. Ac ony chyffessa hynny yn
gỽbyl. ef a a y eneit yr budredyon boeneu. Kam+
syberỽyt yỽ arall. Glythineb. Godineb yỽ vn orei
gỽaethaf. kyghoruynt yỽ pechaỽt chỽenycha+
ỽl a|drỽc yỽ. Ac a|tynnant yr eneidev y|vffernaỽl
boenev. yn ystoria paỽl ebostol y|mae yn dyỽedut
keluydyt vrth boenev vffernn. kyghoruynt ys+
syd blas idaỽ e|hun gỽahanedic. val ffynyaỽn o
bres yn llaỽn o grochanev y|erni ac y|edi yn lloski
yn amlỽc. a|phann gyffroo y|byd godỽrd maỽr val
trystev yn|yr aỽyr. Ac yn gyfulaỽnet o eneideu ac
| « p 115r | p 116r » |