Oxford Jesus College MS. 119 (The Book of the Anchorite of Llanddewi Brefi) – page 14r
Ystoria Lucidar
14r
kymerth hi yr aual gwaharededic. Ac y|ystynna+
ỽd aghev o|e gỽr. Ac yr anghev idaỽ y|bwytaaỽd.
Ac yn|y seithuet awr yn diannot y|gyrraỽd yr
arglỽd* wynt o|baradỽys. Pa|beth uu cherubin.
ar cledyf tan yn|y laỽ. Y cledyf yỽ. mvr tan
yssyd yg|kylch paradwys o|r pann bechỽyt yn+
di hyt heddiỽ. E|cherubin yỽ. egylyawl ge+
itwadaeth megys tan. Pa le yd aeth adaf yna.
y|ebronn yd ymchỽelaỽd yr lle y|gỽnaethpỽyt.
Ac yno y kreawd yntev veibon. Ac yno y|llada+
wd kayn avel. Ac y|bu adaf yna heb achos i+
daw ac eua kan mlyned. Ac y ganet seth yn
lle avel. Ac o etiued hỽnnỽ y ganet krist. A
mi a|vanagaf ytti o amser adaf hyt ar noe.
na bu dafyn glaw. Ac na bu envys. Ac na
vwyttaei dynyon gic. Ac nat yvyn win. A
phob amser oed megys gwannwyn. Ac amyl+
der o bop ryỽ da. Ac gwedy hynny y|ssymudỽ+
yt pob peth o achos pechodev y|dynyon. Pa be+
chaỽt a|wnaeth adaf pann yrrwyt o|baradw+
ys. chwenychv a|wnnaeth bot megys duỽ.
Ac vrth hynny yn erbyn y|gorchymyn y bwyt+
taawd o|r prenn gwahardedic. Pa drỽc uu. vw+
ytta aval. kynn uu hynny o|bechaỽt. Ac na
allei yr holl vyt gwneuthur yawn drostaỽ;
| « p 13v | p 14v » |