Oxford Jesus College MS. 119 (The Book of the Anchorite of Llanddewi Brefi) – page 55v
Ystoria Lucidar
55v
duỽ a|dichaỽnn atgyỽeiraỽ pob aelaỽt yn|y le.
Beth am yr rei | y|bu yma dev benn. ne|vỽy
no dylyet o aelodeu ereill. neu gulyon nev yn
vreisson. a|e val hynny y kyuodant ỽy. Pỽy|byn+
nac yma y|bu dev benn idaỽ. deu gorff a|gyuyt
idaỽ. Ac eneit ym|pob corff. Ac ny byd dim nac
annỽedeid na dybryt arnaỽ. kannys hollyach
a|chyfuan vydant. a chyuyaỽn a chyfulaỽn o
bop tegỽch. Beth a synnyy di am|yr rei erthyl a
berthyno ar hat y|tat yn|y tat y|kyuyt. Ac a
berthyno yr|vam yn|y vam y|kyuyt. Pa ryỽ gor+
fforoed a|vyd yndunt ỽy. rei anuarỽaỽl dilỽgyr
a gloyỽach no|r gỽydyr gỽynn. a uyd yr seint.
Yr rei drỽc y|byd kyrff anuarỽaỽl heuyt dolurus
o anghev hep teruyn byth. a|llygredic vyd. A
hynny pob ryỽ boen arnunt ny ellir ev treuly+
aỽ. a|thyỽyll anghev vdunt. Pa aỽr y|byd y|ura+
ỽt. hanner nos. yr aỽr y|distryaỽd* yr angel yr
eifft. ac yd yspeilaỽd yr arglỽyd vffernn yn|yr
aỽr honno y|rydhaa yntev yr etholedigyonn
o|r byt hỽnn. Pa delỽ y|daỽ yr arglỽyd yr|vraỽt.
megys pann gyrcho amheraỽdyr dinas. y|dygir
o|e vlaen y|goron. ac arỽydon ereill megys yd
adnaper drỽy y|rei hynny y|dyuodyat. Velle
y daỽ crist yr vraỽt yn|y ffuryf y|dysgynnaỽd.
| « p 55r | p 56r » |