NLW MS. 3035 (Mostyn 116) – page 132r
Brut y Brenhinoedd
132r
nys kenedyl y brytanyeit gynt a|noteynt werescyn
peỻ. teyrnassoed y byt yn eu kylch ỽrth eu hewyỻys
Ac ỽrth eu medyant e|hunein Ac ar aỽr hon megys
gỽinỻan da wedy y|diwreidaỽ yn ymchoeledic yn|wher+
wed hyt na eỻy ti amdiffyn dy wlat na|th wraged
na|th veibon Ac ỽrth hyny kynyda titheu kiỽdaỽt+
aỽl abaỻ. kynydha bychan a beth a dyeỻeist ti yr eg+
ylyaỽl ymadraỽd hỽn. Pop teyrnas wahanedic yndi
e|hun a diffeithir a|r ty a syrth ar y gilyd. Ac ỽrth hyny
kanys gỽahanedic dy teyrnas ti a chanys yn·vytrỽyd
kiỽdaỽtaỽl ac annundeb a mỽc kyghorvynt a|ty+
wyỻaỽd dy uedỽl ti. kanys syberwyt ny ataỽd itti
vfydhau y vn brenhin. Ac ỽrth hyny ti a wely dy|wlat
yn anreithedic y gan yr enwiraf paganyeit. Ti a wely
dy tei gỽedy ry|syrthyaỽ ar y gilyd. yr hyn a gỽyn dy
etifed gỽedy ti. kanys ỽynt a welhant kanawon ag+
hyfreith lewes yn medu dy trefyd a|th|dinassoed a|th
gestyỻ Ac eu hoỻ gyfoeth ac eu medyant Ac yn|truan
eu gỽrthlad ỽynteu y alltuded o|r ỻe ny aỻant dyfot
onyt yn anhaỽd ar eu henteilygdaỽt neu ynteu
byth nys gaỻant. ~
A gỽedy daruot megys y|dywespỽyt vchot yr ys+
cymynedic creulaỽn hỽnỽ a|ỻawer o|vilyoed pa+
ganyeit y·gyt ac ef. y anreithaỽ yr ynys oỻ hayach
Ef a|rodes y|ran vỽyaf o·heni yr hon a elwit ỻoeger
y|r saesson. kanys drỽy eu brat ỽy y dothoed ef y|r ynys
hon Ac yna y kilyassant y|brytanyeit yr hyn a|diag+
hyssei o·nadunt y oỻewinaỽl raneu yr ynys. Nyt
amgen kymry a|chernyỽ Ac o·dyno mynych ryfelu
a orugant ar eu gelynyon. A gỽedy gỽelet o teon
| « p 131v | p 132v » |