NLW MS. 3035 (Mostyn 116) – page 59r
Brut y Brenhinoedd
59r
A chyrchu y ỻe yd oed sulyen ac ymlad ac ef. Ac yna eissoes
pan oed gadarnhaf yr ymlad y ỻas seuerus amheraỽ+
dyr a|ỻawer o|e wyr y·gyt ac ef Ac y brathỽyt sulyen
yn agheuaỽl. Ac y|cladỽyt seuerus yg|kaer efraỽc. A gỽyr
rufein a gynhelis y dinas arnadunt yr hynnẏ. A|deu vab
a|edewis seuerus. Sef oed eu henweu. basianus a geta.
Basianus a|hanoed y vam o|r ynys honn. A mam y ỻaỻ
a|hanoed o|rufein. A gỽedy marỽ eu tat. Sef a|wnaeth
gỽyr rufein drychafel geta yn vrenhin a|e ganmaỽl.
yn vỽyaf ỽrth hanuot y vam o rufein. Sef a|wnaeth
y|brytanyeit ethol basianus yn vrenhin a|e ganmaỽl.
ỽrth hanuot y vam o|r ynys honn. Ac ỽrth hynny Sef
a|wnaeth y brodyr ymlad Ac yn yr ymlad hỽnỽ y ỻas
geta Ac yna y|kauas basianus y vrenhinyaeth drỽy ne+
rth y brytanyeit. ~
A c yn yr amser hỽnnỽ yd oed gỽas jeuanc clotuaỽr yn
ynys brydein. Sef oed y|enỽ karaỽn. ac ny hanoed
o lin teyrned namyn o lin issel. Ac eissoes gỽedy kaf+
fel clot ohonaỽ yn ỻawer o|ymladeu o|e deỽred a|e fynẏ+
ant. kychwyn parth a rufein a oruc y geissaỽ kanyat
y gan sened rufein y|warchadỽ o·honaỽ ar logeu aruor+
dir ynys brydein rac estraỽn genedyl. Ac adaỽ o da
vdunt am hynny digaỽn bei kenhettit idaỽ vrenhin+
yaeth ynys brydein. A gỽedy tỽyỻaỽ ohonaỽ sened
rufein drỽy y|ryỽ edewidyon tỽyỻodrus hynnẏ A chafel
kanhat yr hyn yd oed yn|y geissaỽ ymchoelut a|wnaeth
parth ac ynys brydein a|e neges gantaỽ drỽy gedernit
yscrifeneu a|ỻythyreu a·goret ac inseileu senedwyr ru+
fein ỽrthunt. A gỽedy y dyuot y ynys prydein. kyn·uỻaỽ
amylder o logeu aruaỽc a galỽ attaỽ hoỻ jeuenctit
| « p 58v | p 59v » |