NLW MS. Peniarth 11 – page 147r
Ystoriau Saint Greal
147r
A R hynny nachaf deu uarchaỽc urdaỽl yn aruaỽc yn
dyuot geyr bronn y pebyỻ ar gevyneu meirch. ac yn
arganuot gỽalchmei gỽed·y esgynnu ar y uarch. ar uedyr
kerdet racdaỽ heb dybyeit bot yn|reit idaỽ amgen. a|r mar+
chogyon a doethant attaỽ ac a|archassant idaỽ dalu dros y
letty. Nyni heb ỽy a gysgassom myỽn esmỽythdra nei+
thỽyr o|th achaỽs di. ac a|adassam y|titheu y pebyỻ hỽnn
a|e esmỽythdra. a thitheu yssyd yn mynnu mynet ueỻy.
Myn an credeu ninneu y byd reit ytti prynu dy vỽyt ˄ac anry+
ded y pebyỻ. ac ar hynny nachaf y dỽy uorynyon yn dy+
uot y rei a|oedynt yn|digaỽn eu tecket. y|rei a|dywedassant
A vnbenn heb ỽynt yr aỽr·honn yr adnabydỽn ni os tydi
gỽalchmei nei arthur. Myn vyng|cret heb y ỻaỻ. ny theby+
gaf|i aỻel ohonaỽ ef waret y˄r aruer drỽc. drỽy yr hỽnn yr
ym ni yn coỻi dyuotyat marchaỽc urdaỽl attam. A|phan
gigleu gỽalchmei hynny. kewilid maỽr a vu arnaỽ. ac
ygyt a|hynny ef a|weles na aỻei vynet odyno heb geinty+
ach. a|r neiỻ o|r marchogyon a|welei wedy disgynnu a|r ̷
ỻaỻ ar y varch yn aruaỽc. ac yn ymgyffroi yn ffestaf ac
y gaỻei. a gỽalchmei yna a|e kyrchaỽd ynteu. ac o nerth
traet y varch. a chryfder y vreicheu ynteu a|e|trewis yny
dyỻa y daryan. ac yny vyd ynteu ef a|e uarch y|r ỻaỽr. ac
yny vyd y gỽaeỽ dỽy rychwant trỽydaỽ. Myn vyng|cret heb
yr ieuaf o|r morynyon gỽeỻ y gỽnaeth gỽalchmei hediỽ
o|ragor no neithỽyr. Ac yna tynnv y gledyf a|oruc gỽal+
chmei. a|dỽyn hỽyl idaỽ pan erchis y marchaỽc y naỽd
| « p 146v | p 147v » |