NLW MS. Peniarth 11 – page 245r
Ystoriau Saint Greal
245r
a|vu iach o|r briỽ a|gaỽssoed. a chỽbyl o|r marchogyon ereiỻ y am
hynny. vvyd vu briant y orchymynneu arthur ym|pob|ỻe yny
ytoed y brenhin yn|credu o|e|gynghor ef yn vỽy noc y neb. a|drỽc
vu gan y brenhin vynet kei ymeith heb gael dial arnaỽ lad y
vab yn ffyrnic. a gỽedy hynny ryuelu arnaỽ. a|govit maỽr o+
ed y ỽr distadyl gỽneuthur kyflavan kymeint a|honno. ac
am hynny y dylyei yr estraỽn dial hynny arnaỽ yn gystal a|r
kyfnessaf rac bot hynny yn exaỽmpyl y ereiỻ y wneuthur
y kyfryỽ anffydlaỽnder. ~
O vyn briant a|aeth dros gỽbyl o|vrytaen uaỽr. A|r
brenhin a orchymynnaỽd y baỽp wneuthur gorch+
ymynneu briant. a megys yr oed ef diwarnaỽt yng|kaer ỻi+
on nachaf vorỽyn ieuanc yn|dyuot y|myỽn y|r neuad. Arglỽ+
yd heb hi brenhines laudyr a|m anuones i yma y erchi ytti
wneuthur yr|hynn a|erchis y braỽt hi ytti. a hi a|vynn bot
yn vrenhines ac yn arglỽydes ar dy vrenhinyaeth di. a|e chym+
ryt hitheu ohonat yn wreic ytt. kanys bonhedic yỽ a|chyuo+
ethaỽc a|thec. ac y mae yn erchi ytt yr y|charyat hi gỽrthlad
ohonat o|th|wlat y gret newyd. a chredu y|r duỽ y cret hithev
idaỽ. ac onyt tydi a|wna hynny nac ymdiryet ti vot yn deu
ytti dim o|r wlat honn. kanys breinhin* magdalans y braỽt
hi yssyd gỽedy ymgyweiryaỽ a ỻuydaỽ ar vedyr dyuot y los+
gi alban. ac a|dyngaỽd na orffowyssei vyth yny darffei idaỽ
diua kỽbyl o|r|hoỻ ynyssed yssyd berthynas y|th|wlat ti. ac
| « p 244v | p 245v » |