NLW MS. Peniarth 190 – page 265
Penityas
265
hun y|myỽn gormod angcrynodeb. drỽy ga+
dỽ yn|weỻygyus yr hynn a orchymynnit
ym. ac na madeueis o|m caỻon y|r neb a|w+
nelei ym enwired. namyn drỽy chỽenny+
chu dial o gaỻon ac o eneu. ac o weithret
yn annogedigaetheu. yn ymanhyedeu
maỽrdrygyaỽc. yn an·wybot a ỻesged ac
ebryfedigaeth. yn ỻudyas alussenneu. Yn
garỽhau ỽrth yr anghenogyon. Yn tremy+
gu vyng|kyfnessafyeit. ac na ovỽyeis y
rei cleifyon. ac na chledeis y meirỽ. ac na
wisgeis y rei noethon. ac na phortheis yr
eissiwedigyon. ac na rodeis diaỽt y|r syche+
digyon. ac na chymereis beỻenigyon yn
drugaraỽc. ac na rodeis dylyedus anryded
y|r sulyeu a|r gỽyleu. ac na buchedockeis
yn vessuraỽl. ac yn diweir. ac o dreulaỽ
vy amser yn orwac ac yn segur. O gyt·syn+
nyaỽ a|r rei a|m annogynt ar drỽc. O ar+
gywedu y lef y gỽeinyeit. yn haỽs gennyf
no|e ganhorthỽyaỽ. ac na|s|gỽarandeweis
| « p 264 | p 266 » |