NLW MS. Peniarth 31 – page 18v
Llyfr Blegywryd
18v
vn braỽdỽr trỽy sỽyd. A phetwar megys y rei
kyntaf ym pop llys yn deheuparth. a lliaỽs o
vraỽtwyr nyt amgen no phob perchen tir. me+
gys yd oydynt kyn hywel da o ureint tir heb
sỽyd. O hyn allan y trethir* o gyfreitheu y wlat
ar sỽydocyon dywededic. Ac yn gyntaf o teir co+
lofyn kyfreith y dywedir. Galanas a|e naỽ aff+
eith. Tan a|e naỽ affeith. Lletrat a|e naỽ affe+
ith. Galanas yỽ llad dyn. Llosc yỽ gỽan tan
y myỽn y peth a losger. Lletrat yỽ symut o|e le
yr hyn a dyccer yn lletrat. Beth bynhac a|ỽnel+
her yg kylch y tri gueithret hyn; affeith yỽ.
ỽrth lad. neu losc. neu letrat. Ac ỽrth hynny
y tri naỽ affeith achỽysson ynt trỽy y gweith+
ret y gỽneir y gueithretoed hynn. Trỽy kyt+
ssynnyaỽ yỽ yr holl affeitheu. Rei o·honunt
trỽy olỽc. Ereill trỽy eireu. ereill trỽy weith+
retoed. megys llygrudyaeth*. neu tauotrud+
yaeth. neu weithret a uo llei no|r mỽyhaf. sef
yỽ y mỽyhaf. colofyn kyfreith.
KYntaf affeith yỽ. menegi yr llofrud y
lle y bo y dyn a uynnei ef y lad. Eil yỽ.
rodi kyghor y lad dyn. Trydyd yỽ disgỽyl brat
ar dyn. Petweryd yỽ dangos y dyn yr llofrud
| « p 18r | p 19r » |