NLW MS. Peniarth 32 (Y Llyfr Teg) – page 128
Llyfr Iorwerth
128
vot yn eneit·uadeu. Ereiỻ a dyweit o bop aniue+
il pedwar troedaỽc y vot yn eneit·uadeu. Eis+
soes diogelach yỽ hyt y pedeir keinhaỽc. Y ỻeidyr
a werther; seith punt vyd y werth. Yr hỽnn a
vo eneit·uadeu; ny dylyir dim o|e|da. kan·ny dylyir
diuỽyn a|dial. dy·eithyr talu y|r coỻedic yr eidaỽ.
Sef achaỽs yỽ; ỽrth na dyly adaỽ vn dylyet
arnaỽ. Yg|kyfreith howel y bu tal ac eil tal
am bop ỻedrat. ac y symudaỽd bledyn uab
kynuyn; talu y|r dyn y goỻet ỽrth y damdỽg.
Da y ỻeidyr; y ford y kymynho. aet. ony byd
plant; ny dyly kymynnu dyeithyr y daeret
y|r|eglỽys. a|e dylyedyon. Ny dyly yr arglỽyd e+
bediỽ dyn a|dihenydyo e|hun. O|r dihenydyir
yg|gỽlat araỻ; yr arglỽyd a|dyly y ebediỽ. Ny
byd galanas am leidyr. ac ny byd ỻys y·rỽg
dỽy genedyl yr y|dihenydyu. Gỽynwyr* o wlat
araỻ a draenho ac eu harglỽyd o delir; eu bot
yn ỻadron gỽerth. ac o|r ỻedir; ef a|dylyir ga+
lanas ymdanunt. Bratwyr arglỽyd a fyrnic+
wyr. a|phob dyn a vo eneit·vadeu o vraỽt y kyfreith.
ny dylyir galanas ymdanunt. Fyrnicwyr
o|r gỽadant eu fyrnicrỽyd; deu kymeint eu
gỽat a gỽat ỻedrat. Sef yỽ ỻedrat; pob peth
a watter o|r a|dycker. Sef yỽ aghyuarch; pob
peth a dycker yn absen ac ny watter. Sef yỽ treis;
| « p 127 | p 129 » |