NLW MS. Peniarth 32 (Y Llyfr Teg) – page 40
Llyfr Iorwerth
40
hi a|r neiỻ|troet yn|y gỽely. a|r ỻaỻ odieithyr y gỽe+
ly. y gỽr kyntaf a dyly kaffel y wreic. O deruyd y
wreic wryaỽc wneuthur kyflauan dybryt. ae
rodi cussan y ỽr araỻ. ae gadel dodi byssed yndi.
ae gadel bot genthi; sarhaet o|e gỽr yỽ hynny.
Os bot genthi a|deruyd; y sarhaet honno a|drych+
efir ar|uod yr hanner yn vỽy. kanys o genedyl
elynyaeth yd hanyỽ. Os dodi byssed yndi a deruyd;
talet idaỽ y sarhaet. a honno heb ardrychafel.
Os rodi cussan a|wna; talet idaỽ deu·parth y
sarhaet. kanyt gỽeithret kỽbyl. Os gỽadu kaffel
y·rỽg y deu uordỽyt; rodet y|gỽr ỻỽ degwyr a deu+
geint. a|r wreic ỻỽ degwraged a|deugeint. Os
gỽadu rodi byssed yndi a|wna; rodet y gỽr lỽ pe+
dwar|gỽyr ar|dec. a|r wreic lỽ pedeir gỽraged ar|dec.
a|r rei hynny o|e chyfnessafyeit y am y mam. a|e
that. a|e brodyr. a|e chwioryd. Os gỽadu rodi cus+
san a|wna; rodet y gỽr lỽ seith|wyr. a|r wreic lỽ
seith wraged. a|r rei hynny oc eu kyfnessafyeit.
Pỽy bynnac a dycko morỽyn lathlut. a chynn
bot achaỽs y·rygthaỽ a hi. gouyn o·honei idaỽ
beth a|rodei ef idi hi. a meintoli o·honaỽ ynteu
y|meint a|rodei idi ar y gret. kyt keissyo ef y
wadu gỽedy hynny. os gyrr hi arnaỽ ef. creda+
dỽy yỽ hi. kanys yna y mae geir y geir hi ar
y gỽyrdaỽt. kan duc ef hi y|r ỻe nyt oed neithaỽr+
| « p 39 | p 41 » |