NLW MS. Peniarth 38 – page 37r
Llyfr Blegywryd
37r
gỽr a|dichaỽn y gỽrthot. a hi a dyly colli y holl dy+
lyet. o rodi cussan heb vn o|r deu ỽeithret ereill. ~ ~
O|r kyttya gỽr a gỽreic gỽr arall; talet idaỽ y sa ̷ ̷+
rhaet dan y ardrychafel vnỽeith kanys o gene*+
dlaet elynyaeth yỽ. Dros ofyssyaỽ y telir sarhaet
heb drychafel. dros gussan; trayan y sarhaet a
vyd eisseu idi. kany bu ỽeithret cỽbyl yrydunt;
nac o tỽyllofeint idi na phy ỽed bynhac y rodit
y cussan. Y neb a gussano gỽreic gỽr arall; ta+
let petỽared ran y sarhaet. ac velly o|r gofyssyaỽ
onyt o|r gỽarae a|elỽir gỽarae raffan. neu y|g+
hyfedach. neu pan del dyn o|bell. y neb a|ỽnel
cỽbyl ỽeithret cỽbyl sarhaet a|tal. Goronỽy
vab moridic a dyỽedei na|dyly gỽr yr bot gan
ỽreic arall a|r ỽreic yn da genti talu dim idaỽ
tra ganmho* hi y gỽeithret. y|ỽreic a|dyly talu
y sarhaet y|r gỽr. neu y|r gỽr a|e gỽrthotto yn
ryd. O|r dỽc gỽr ỽreic yn llathrut. a mynet y
ty vchelỽr a hi; kymeret yr vchelỽr vach y gan
y gỽr ar holl iaỽn y ỽreic kyn eu kyscu ygkyt.
| « p 36v | p 37v » |