NLW MS. Peniarth 45 – page 236
Brut y Brenhinoedd
236
hined y gadyssei ynteu lle baraf arthur yn uchaf
ar y pilis. Ac ony ulynghyei y baryf yn uuud
erchi y arthur dyuot y ymlad ac ef. Ar hỽn a
orffei o·honunt. kymerei y pilis a|baraf y llall.
Ac gỽedy ymlad onadunt. y goruu arthur. a|dỽ+
yn y uaryf a|e pilis y gantaỽ a|e lad. Ac gỽedy
hỽnnỽ ny chyuaruuassei ac arthur un gỽr kyn
cadarnet ar llall. Ac y doethant a phen y caỽr
yn anryuedaỽt yr llu. A phaỽb o|r a|e gwelei yn
moli y gỽr y rydhassei y wlat o|r ryỽ ormes
honnỽ*. Ac eissoes tristau a oruc hywel o ang+
heu y nith. Ac erchi gỽneuthur eglỽys uỽch y
phen yn|y mynyd. Ac o enỽ y uorỽyn y gelwir
y lle hỽnnỽ. Bed helen er hynny hyt hediỽ.
AC gwedy ymgynnull paỽb y gyt. kyr+
chu a|oruc arthur odyno partha* ar dinas a
elwit augustunum. Ac gỽedy y dyuot y af+
on wenn y dywetpỽyt idaỽ bot yr amheraỽdyr
yn lluestu yn agos y hynny. A chymeint o
lu gantaỽ ac nat oed haỽd y neb y arhos. A
phebyllaỽ a oruc ynteu y lu ar lan yr auon
lle gallei lluneithu y lu o|r bei reit idaỽ. Ac
yna yd anuones at yr amheraỽdyr. Boso o
ryt ychen. A gereint garanwys. A gwal+
chmei uab gỽyar y erchi idaỽ mynet o ter+
| « p 235 | p 237 » |