NLW MS. Peniarth 46 – page 180
Brut y Brenhinoedd
180
eu tyỽyssaỽc tir a|dayar a rodes yn|llun+
dein lindysei megys y gallei ymossyme+
ithaỽ yn da ohonaỽ ac ef a|e niuer. ac
odyna mal yd oed ystryỽys hengist. a
chall gỽedy gỽybot ohonaỽ cael cary+
at y|brenhin. y|dyỽat ỽrthaỽ ual hynn.
arglỽyd heb ef dy elynyon di yssyd yn
ryuelu arnat o|bop parth. a heuyt hyt
y|gỽelir ymi y·chydic o|th teyrnas a|th
car. canys dy uygythyaỽ y|mae llaỽer
onadunt. o dỽyn emreis ỽledic am|dy
benn. y|th diot o|th urenhinaeth. ac
os da gennyt ti. kyghor yỽ gennyf|i
anuon hyt uy|gỽlat i. y|ỽahaỽd mar+
chogyon etỽa odyno megys y bo kadarn+
nach an niuer ni y|ymlad a|th elynyon
di. ac ygyt a|hynny heuyt un arch
a archaf|i yt. pei na bei rac uy neccau
ohonat. anuon di hep y gortheyrn dy
kennadeu hyt yn germania y|ỽahaỽd a
uynnych odyno. ac arch y|minheu ac ̷
| « p 179 | p 181 » |