NLW MS. Peniarth 46 – page 320
Brut y Brenhinoedd
320
euo. a|phann ỽelas y bryttannyeit y|brenhin yn
ymlad. yn|y ỽed honno. kyrchu a|ỽnaethant
ỽyr ruuein. o|un uryt. a gỽrthỽynebu a
ỽnaethant ỽynteu udunt ỽy yn ỽychyr.
ac o|dysc amheraỽdyr rufein. llauuryaỽ a|ỽna+
ethant ỽynteu y|talu aerua elchỽyl y|r
bryttannyeit. a chymeint uu yr aerua y+
na o|bop parth a chyt bei yr aỽr honno y|de+
chreuit yr ymlad. O|r neill parth yd oed yr
ardechaỽc urenhin. arthur yn llad y elynyon.
ac yn annoc y|ỽyr. ac o|r parth arall yd|oed
les amheraỽdyr rufein. yn dyscu y|ỽyr ynteu. ac
yn|y moli. ac o|bop parth yna y|bu aruthyr
aerua hyt nat oed neb a ỽypei pa diỽ y
damỽein y|uudugolyaeth. a|phann ytto+
ydynt yn|yr ymffust truan hỽnnỽ. nach ̷+
af morud tyỽyssaỽc caerloeỽ yr hwnn a
edeỽissit y|gỽersyllt a lleg gantaỽ o|ỽyr ar+
uaỽc yn kyrchu y elynyon. ac yn gyflym
yn mynet drostunt. ac yna y|dygỽydaỽd
llaỽer o uiloed onadunt. ac ym|plith y|by+
dinoed y|gỽant un a|gleif lles amheraỽdyr
ruuein. ac o|r|dyrnnaỽt hỽnnỽ y|bu uarỽ
| « p 319 | p 321 » |