NLW MS. Peniarth 9 – page 3v
Ystoria Carolo Magno: Chronicl Turpin
3v
1
nys ganet megys dyn. ỽrth hyny marỽ uu
2
val dyn. Canys paỽb o|r a aner a uyd marỽ.
3
A|chanys credadỽy yỽ y anedigaeth a|chreda+
4
dỽy yỽ y varolyayth neu y diodeuedigaeth.
5
Ac odyna y gyuodedigaeth o veirỽ. Pa delỽ
6
y gellit gredu y gyuodedigaeth heb y kaỽr.
7
Canys a aner heb y rolond a uyd marỽ. Ar
8
hỽn a uu varỽ a gyuodes y trydydyd. A|ryue+
9
du yn vaỽr a oruc y caỽr pan kigleu y geir.
10
ac atteb idaỽ val hyn. Rolond heb ef gorwac
11
yỽ a dreitheist ỽrthyf hyt hyn. ny allei byth
12
gyuodi dyn o varỽ yn vyỽ. Nyt mab duỽ y
13
hun heb y rolond a gyuodes yn vyỽ o varỽ
14
namyn o|r a uu o dynyon o dechreu byt ac a
15
vo hyt y diwed a gyuodant rac bron y gadeir
16
ynteu y gymryt tal eu gỽeithredoed mal y
17
gỽnel paỽb nac yn drỽc nac yn da. Duỽ
18
o|r plenhigyn a wna tyuu y pren yn uchel.
19
Ar gronyn gỽenith wedy y dreỽho yn|y day+
20
ar a|y varỽ. a|e gỽna y tyuu ac y ffrỽythaỽ
21
y vyỽ dracheuyn. ynteu a wna kyuodi pa+
22
ỽb yn|y dyd diwethaf o veirỽ y vyỽyt. Ed+
23
rych ar annyan y lleỽ canys y lleỽ o|y vreue+
24
rat a vyỽhaa y gynaỽon y trydyd wedy y
25
ganer yn varỽ. pa ryued yỽ kyuodi o duỽ
26
dat y vab ynteu y trydydyd o veirỽ. Ac ny
27
dyly bot yn ryued genyt gyuodi mab duỽ
28
o varỽ pan gyuottynt llawer o veirỽ kyn
29
noc ynteu. Canys elias ac eliseus a wnayth+
« p 3r | p 4r » |