BL Additional MS. 19,709 – page 20v
Brut y Brenhinoedd
20v
bifrontis iani. a|phan delei vylua y demhyl hono y deuei ˄hoỻ
grefydwyr y dinas a|r wlat o|e an·rydedu ac y|dechrewit
pop gỽeith o|r a|dechreuit hyt ym|pen y vlỽydyn. a gvedẏ
a gvedy gvledychu pymp|mlyned o gordeiỻa yn tagne+
uedus y kyfodes y deu nyeint yn|y herbyn. Margan
vab maglavn tywyssavc yr alban a chueda vab hen+
wyn tywyssavc kernyv a ỻu aruavc gant unt a|e daly
a|e charcharu. ac yn|y karchar hvnv o dolur coỻi y|chyfo+
eth y gỽnaeth e|hun y ỻeith. ac y ranassant vynteu ẏ
kyfoeth y·rygtunt ac y doeth y vargan o|r tu draỽ y hu+
myr y gogled y·dan y theruyneu. ac y doeth y guneda y
parth|yma y humyr ỻoegẏr a|chymry a chernyv. a|chyn
pen y dỽy vlyned y kyuodes annuundeb y·rygtunt ỽyn+
teu am vot pendogyn y|kyfoeth gan guneda ac ef yn
ieuaf a|margan yn hynaf ac ar y ran leiaf. a|chynuỻaỽ
ỻu a|wnaeth margan ac an·reithav kyfoeth cuneda o
dan a hayarn. a|dyuot a|wnaeth cuneda yn|y erbyn a|e
erlit o|pop ỻe yny doeth hyt yg|kymry ac ar uaes mavr
ym·gyfaruot. ac yna y ỻas margan. ac o|e env ef y gel+
wit y ỻe maes margan yn|y ỻe y|mae manachlavc
vargan. a gvedy y vudugolyaeth hono y kymerth cu+
neda ỻywodraeth ynys. prydein. ac y|gvledychvys yn dagno+
uedus deg|mlyned ar hugein ac yn yr amser hvnnv
yd oed isaias yn proffỽyt yg|kaerussalem. ac yn yr
vn amser yd adeilỽyt rufein y gan deu vroder remus
a romulus.
A gỽedy marỽ kuneda y doeth rywaỻaỽn y vab yn+
teu yn vrenhin. ac yn oes y gỽr hvnỽ y bu y glaỽ
| « p 20r | p 21r » |