BL Additional MS. 19,709 – page 61r
Brut y Brenhinoedd
61r
1
kanys ỻawen oed y brenhin yn aruoỻ paỽb onadunt
2
ac yno y|dathoedẏnt y|saỽl vonhedigyon a dyly+
3
edogyon gyt ac eu gỽraged. ac eu merchet megys
4
yd oedynt teilỽg o|enryded kymeint a hỽnnỽ ̷ ̷
5
ac yno y doeth gỽrlois tẏwyssaỽc kernyỽ ac eigyr
6
y wreic ygyt ac ef. a|phryt y wreic honno a|e thegỽch
7
a orchyuygei wraged ynys. prydein. oỻ. kany cheffit vn ̷ ̷
8
kyn|decket a hi a gỽedy gvelet o|r brenhin
9
eigẏr ym|plith y gvraged ereiỻ. syỻu a oruc arnei yn ̷
10
graff ac ymlenwi o|e charyat yn|gymeint ac nat
11
oed dim gantaỽ namẏn hi e|hunan. a|e hoỻ vedỽl
12
a|e hoỻ ynni yn|y chylch hi y treiglei ef. ac y honno
13
e|hunan yd anuonit yr an·regyon odidaỽc a|r gỽi ̷+
14
rodei a|r annercheu serchaỽc heb orffowys. ac yn
15
vynych amneidaỽ arnei a|chwerthin a geireu di+
16
gryf gỽaryus a dywedei. a|phan welas y gỽr hi hyn+
17
ny. ỻidyaỽ a oruc yn vỽy no meint a heb ganhat
18
yn gyffroedic adaỽ y ỻys yn dianot. ac ny bu yn|y
19
ỻys neb a aỻei y wahavd. kanys ofyn oed gantaỽ ̷ ̷
20
coỻi yr hyn mvyaf a garei o dim bydavl. ac vrth
21
hẏnnẏ ỻidyaỽ a oruc y brenhin ỽrthaỽ. ac erchi
22
idav ymchoelut ẏ|r ỻys y|wneuthur iaỽn y|r bren+
23
hin o|r sarhaet a|wnathoed am adaỽ y lys yn ag+
24
hyfreithavl yn herwyd y barnei gyfreith ỻys idaỽ.
25
a gỽedy nat ufydhaei ỽrlois idaỽ ỽrth y orchym+
26
yn. ỻidyav yn vaỽr a|oruc y brenhin. ac yn|y lit
27
a|e gyffro y|guyd anreithei y gyfoeth yn hoỻaỽl
| « p 60v | p 61v » |