BL Additional MS. 19,709 – page 7r
Ystoria Dared
7r
a deiphebus a|e lu a deuth yn|y erbyn. ac achil ynteu o lit
am y wreic nyt aeth y|r vrỽydyr. a|phalamides a gauas ach+
aỽs ac a gyrchỽys deifebus ac a|e ỻadaỽd. ac ymlad yn hag+
at a gyuodes y·rydunt a gyrru ffo arnadunt o pop parth
a milyoed ỻawer o|dẏnẏon a|dygỽẏdassant. a|phalamides
a|ymhoeles at y vydin yn gyntaf ac a|e hannoges ỽẏ ẏ
ymlad yn da. ac yn y erbẏn ef y deuth sarpedon yn ỽychyr
a|phalamides a|e ỻadaỽd ef ac ual y daruu idaỽ y|lad ef a|ym+
hoeles at y vẏdin yn ỻawen ac yn vaỽr·vrydus. ac yn o+
gynedus. ac alaexander paris a|e byrryvys ef a saeth ac a|e
brathỽys yn|y vynỽgyl a gỽẏr troea a ymhoelassant ac
a gyttaflassant ergyttyeu y|r rei ereiỻ. ac y·veỻy y|ỻas pa+
lamides. ac val y|ỻas y brenhin y|dygỽydassant gỽyr goroec
a|gỽyr troea a|wnaethant deruysc maỽr arnunt. ac ỽynteu
a|foassant y eu kestyỻ. a|gỽyr troea a|e hymlynassant ac a
ymladyssant a|r casteỻ. ac a yscynassant yn eu ỻogeu. ac
y achil y|datkanỽyt hyny. a c ynteu a|e kymerth arnaỽ
ual na|s|gỽybydei dim y|ỽrthaỽ. ac eissoes aiax a|e hamdi ̷+
fynỽys ỽy yn gadarn a|r nos a wahanỽys yr ymlad a gyr*
goroec yn eu kestyỻ a gỽynyssant balamides a|e gyfyaỽn+
der a|e waredogrỽẏd a|e dayoni. a gỽyr troea ỽynteu o|r
parth araỻ a gỽynassant sarpedon a deiphebus. ac yna
nestor tywyssaỽc o roec a oed mỽyaf a hynaf o|r vydin a|el+
wis hyt nos y|tywyssogyon ẏg|kygor ac a|e aghygores ac a
annoges udunt wneuthur a·gamemnon yn amheravdẏr
arnunt ac ef a duc ar gof vdunt dra vu benaf ac am+
heraỽdẏr ef ẏr dyborthi o·honaỽ ef ymladeu yn rỽyd a
ry|uot yn digaỽn detwydyd eu ỻu ac eff a erchis y baỽb
| « p 6v | p 7v » |