Breudwd Welsh Prose 1300-1425
Cymraeg

BL Cotton Titus MS. D IX – page 11v

Llyfr Blegywryd

11v

nunt. ac y waranndaỽ haỽlỽyr. ac amdi  ̷+
ffynnỽyr y|myỽn dadleueu. ac y|vot ygyt
ac ygneit vrth rodi barnneu. ac y|warann+
daỽ amryssoneu. Ot anuonnant at y|bren+
hin yr hynn a|uo petrus gantunt. ac a|vyn+
hỽynt trỽydaỽ ynteu y amlyccau. gỽnelent
velly trỽy y|vlỽydynn gỽbyl. Odyna y|dy  ̷+
ly caplan y brenhin y|dỽyn ef y|r eglỽys.
a|chyt ac ef y|deudec sỽydauc arbennic
llys vrth offeren. ac gỽedy offeren ac off  ̷+
rỽm y gann baup. paret y caplan idaỽ tygu
ar|y|creir. ac ar|yr allaỽr. ac y wnyeitheit
a|dotter ar|yr allaỽr. na rodho cam varnn
vyth hyt. y|gỽyppo. nac yr a·dolỽyn neb.
nac yr y|gỽerth. nac yr caryat. nac yr cas
neb. Gỽedy hynny deuent y·gyt at y|bren  ̷+
hin. a|dywedent yr hynn a ỽnaethant ym+
danaỽ. ac yna y|dyly y|brenhin rodi sỽyd
idaỽ. o|byd bodlaỽnn idaỽ. a|e lehau y|my+
ỽn eistedua dylyedus idaỽ. ac yna y|dyly+
ir rodi ouer|tlysseu idaỽ. Taỽlbort y|gann
y|brenhin. a|modrỽy eur y gan y|vrenhines.
ac na rodet. ac na werthet y|rei hynny vy+
th. Ny|dyly vot yn vraỽdỽr. namyn y|neb
a|dyscer mal hynny. neu a|uo kyuarỽyd
y|myỽn kyureith. ac a|tygho mal hỽnnỽ.