Cardiff MS. 1.362 (Hafod 1) – page 51v
Brut y Brenhinoedd
51v
a uei adas gantaỽ. o|r diwed ef a doeth hyt ymynyd eryri. A
gỽedy caffel ohonaỽ le a|uu adas gantaỽ wneuthur y kas+
tell. kynnullaỽ a|wnaethpỽyt a allỽyt y gaffel o seiri mein.
ac eu dỽyn yno. A gỽedy gossot y grỽyndwal onadunt. ky+
meint ac a|wnelit y dyd o|r gỽeith; trannoeth pan gyuotit
neur daruydei yr dayar y|llyncu heb ỽybot dim y wrthaỽ.
mỽy no|chyny ryffei eiroet uch y dayar. a gỽedy menegi
hynny y wrtheyrn; gouyn a|wnaeth yỽ dewinnyon peth
a|wnai hynny. Ac yna yd erchis y dewinnyon idaỽ; keis+
saỽ mab heb tat idaỽ. a llad hỽnnỽ. A chymyscu y waet
ar kalch. Ac iraỽ y mein heuyt ar kalch a gỽaet y mab.
A dineu y gỽaet yn|y grỽndỽal. Ac y velly y sauei y gỽe+
ith. Ac yna yd anuonet y pop lle y geissaỽ y kyffryỽ vab
hỽnnỽ. A gỽedy dyuot deu o|r kanhadeu hyt y dinas a
elwit gỽedy hynny. kaeruyrdin. Nachaf y gỽelynt
bỽrn o|weisson ieueinc yn gỽare yn dỽrs* y dinas. A sef
a|wnaethant y kynhadeu dynessau y edrych ar y gỽa+
re. Ac eisted yn lludedic dyffygyaỽl. Ac y waryndaỽ am
eu negys y dothodynt o|e cheissaỽ. A gỽedy bot y gỽeis+
son velly yn gỽare yn hir veith. daruot a|wnaeth rỽg
deu onadunt a elwit myrdin. Ar llall a elwit dunaỽt.
ac yna y dywaỽt dunaỽt ỽrth vyrdin. py achaỽs heb
ef yd amryssonyt ti a miui nac y kynhenny. kans dyn
tyghettuenaỽl ỽyt heb tat itt. A minheu a henỽyf o
vrenhinaỽl lin o pleit mam a|that. A phan gigleu y
kannadeu y gyireu hynny. Drychauel eu ỽynebeu
a|wnathant y edrych ar vyrdin. A gouyn yr dynnyon
a oed yn eu kylch pỽy oed y gwas. Ac ỽynteu a|dywdas*+
sant na wydyynt ỽy pỽy oed y tat ef. nac a oed tat idaỽ.
| « p 51r | p 52r » |