Oxford Jesus College MS. 119 (The Book of the Anchorite of Llanddewi Brefi) – page 114v
Ystoria Adrian ac Ipotis
114v
beth a|ỽney di weithon. Arglỽyd heb ef mi a|th
a|glyỽaf yn dyỽedut yn eglur. ac yd|ỽyf ynn
annobeithaỽ am dy ỽelet. yna y|gouynnaỽd duỽ
y adaf paham y|gỽnaethost ti hynn o weithret
gỽahardedic. Ac odyna vrth Eua y|dyỽat. pa+
ham y|gorugost ti y|gỽeithret hỽnn. Adaf a|dyỽat
vrth duỽ. Eua y|ỽreic a|rodeisti ym gymar ym a|er+
chis ymi ỽneuthur hynn. Eua a|dyỽat yna y|nei+
dyr heb·yr hi a|ỽnaeth ym ỽneuthur y|gỽeithret
hỽnnỽ. Ac am|hanoges ac am tỽyllaỽd. yna y|gof+
uynnaỽd duỽ yr neidyr paham bryf vffernnaỽl
y|pereisti vdunt pechev val hynn. y|neidyr kythreu+
raỽl a|dyỽat. kennvygenn oed gennyf veddv o+
honunt ar|leỽenyd paradỽys yr hỽnn a|golleis i
am|y kam·syberỽyt. yna y|dyỽat duỽ vrth adaf.
o achos dy gam weithret. ti a|lafuuryy dy ym+
borth trỽy chỽys a|llauur a|gỽres ac oeruel.
Ac odyna y|dyỽat vrth Eua. am dy|gam annoc
ar|y pechaỽt. tithev a|vydyy dan oruthyr gwr.
a|chystegeu gofualus. ac a|dygy ffrỽyth trỽy ro+
nan a|chỽynnvan ti a|th eppil o|r dyd hediỽ allann.
A gỽedy hynny y|dyỽat duỽ holl gyfuoethaỽc vrth
Satan. ti bryf yn rith kythreul yd ỽyt yn gỽneu+
thur prouedigaeth ar dynyon. ac am hynny ti a
ymlusgy ar dy voly o|hynn allann. a|phaỽp o|r a
| « p 114r | p 115r » |