NLW MS. Llanstephan 27 (The Red Book of Talgarth) – page 109r

a|oruc pilatus ar y deudengwyr a|garnhaei* yr ymadraỽd hỽnnỽ

a|dywedut ỽrthunt. Mi a|ch|tynghetaf yn enỽ cesar ae gỽir a

dywedassaỽch nat o ffyrnigrỽyd y|ganet ef. Kyfreith a dedyf yssyd

ynni heb ỽynt na thyngom ni. a chanys pechaỽt yỽ. a* chanys*

pechaỽt yỽ tyngent ỽy yr iechyt y cesar y eni ef o ffyrnigrỽyd.

Ac yna y dywaỽt annas. a chaiphas ỽrth pilatus. y deudengỽyr

hynn a|gredy di heb ỽy. ar na anet ef o ffyrnigrỽyd. a ninneu oỻ

yn|dywedut y vot ef yn gyfarỽyd yn ongar. a|dywedut ohonaỽ

y uot yn vab y duỽ. ac yn vrenhin. ni|n credir ni. Ac yna yd er+

chis pilatus y baỽb mynet aỻan dyeithyr y deudengwyr a|dyỽ+

edassynt na hanoed Jessu o ffyrnigrỽyd. ac erchi gỽahanu

Jessu y ỽrthunt. Pa achaỽs heb ef y mynnant ỽy dienydyu

hỽnn. Eidiged heb ỽy yssyd arnunt. am Jachau dynyon o+

honaỽ y sadỽrn. Ac am Jachau o|e weithret da ef y|mynnant

ỽy y dihenydyu ef heb·y pilatus. Je heb ỽynt. Ac yna yd a·eth

pilatus aỻan o|r dadleudy. a|dywedut yna ỽrth yr idewon a|oruc.

y mae yr|heul yn dyst y mi nat yttỽyf yn kaffel neb·ryỽ gam ar

y dyn hỽnn. Ac yna y|dywaỽt yr Jdewon ỽrth bilatus. Pei na|wne+

lei hỽnn drỽc ny|s rodassem ni efo ytti. Kymerỽch chỽi efo heb+

y pilatus. a bernỽch aỽch dedyf. Nyt kanyat ynni lad neb

heb ỽynt. Nyt y chỽi heb·y pilatus y dywaỽt duỽ na lad. namyn

ymi. yna eilweith y dywaỽt pilatus wedy y dyuot y myỽn ỽrth

Jessu. Tydi heb ef yỽ brenhin yr idewon. Ac yna yd attebaỽd

Jessu idaỽ. ae ohonat dy hun y dywedy di. ae ereiỻ a|e dywaỽt ytt.

Dy genedyl dy hun ac esgyb ac offeireit a|th rodassant ti ymi.

a|pha|beth a|wnaethost di. Heb·yr Jessu. nyt yn|y byt hỽnn y mae

vyn|teyrnas i. Pei yn|y byt hỽnn y bydei vyn|teyrnas i vy+|ngwas