NLW MS. Llanstephan 27 (The Red Book of Talgarth) – page 130v
Ystoria Bilatus
130v
nuỻaỽ diruaỽr sỽỻt yno o·honaỽ. mynet a|oruc a|r sỽỻt
hỽnnỽ heb gennat eraỽdyr. a|e dwyn y tiberius amheraỽ+
dvr. a|chymryt ystyn y gan yr amheraỽdyr ar y|medyant
a wassanaethassei y·dan eraỽdyr. ac o|r achaỽs hỽnnỽ y tyf+
aỽd gelynyaeth y·rỽng eraỽdyr a philatus yny ymgymo+
dassant yn amser yn arglỽyd ni Jessu grist. ac y rodes ach+
aỽs araỻ hagyr y dywedir y·ryngthunt yn ystorya eu hys+
golaỽl. Sef oed hynny neb·un dyn a|m gỽnaeth yn uab y duỽ
a dwyỻassei ỻawer o|r Jdewon. a gỽedy eu honnaỽ* y|r ỻe a|el+
wir gazarim. y ỻe y dywedassei hỽnnỽ yd esgynnei y|r nef.
pilatus a|e ỻadaỽd ac a oed ygyt ac ef. rac tỽyỻaỽ ohonaỽ yr
Jdewon ereiỻ ual|hynny. ac o|r achaỽs hỽnnỽ y buant elyny+
on pilatus ac eraỽdyr. kanys eraỽdyr bioed galilea. a|phob
un o|r deu achaỽs hynny a eiỻ bot yn wir. Ac eissoes pan ro+
des pilatus yr arglỽyd y|r idewon y grogi. ouyn uu ganthaỽ
godi tiber amheraỽdyr. am ry|gyuyrgoỻi gỽaet gỽirion o+
honaỽ. yd anuones att yr amheraỽdyr nebun yd|ymdiredei i+
daỽ y esgussaỽ drostaỽ. ac yn hynny y|dygỽydaỽd heint a|chl+
afri ar yr amheraỽdyr. ac y menegit idaỽ vot medic yng|ka+
erussalem a|e iachaei o|e ymadraỽd bob dyn. ac ny wydyat
ef daruot y pilatus a|r idewon y grogi ef yna. ac yd anuones
yr amheraỽd* att pilatus annwylwas idaỽ yd ymdiredei yn+
daỽ yn uaỽr o|e gyfrinach valesianus oed y enỽ. y erchi idaỽ
gyntaf ac y gaỻei anuon attaỽ y medic a oed yno yr hỽnn
a aỻei y wneuthur ef yn iach ual y dywedassit idaỽ. A phan
doeth hynny att bilatus y venegi idaỽ y gennadỽri honno y
gan yr amheraỽdyr. dychrynu a|oruc pilatus. ac erchi oet py+
theỽnos
| « p 130r | p 131r » |