NLW MS. 3035 (Mostyn 116) – page 26v
Brut y Brenhinoedd
26v
goroec y|genedyl a vuassei y saỽl vlỽynyded hyny yg
keithiwet y·danadunt ỻauassu onadunt ỽynteu an+
uon y|ryỽ lythẏr hỽnnỽ atunt hỽy na medylyaỽ ona+
dunt keissaỽ bỽrỽ gỽed keithiwet y|arnadunt ac ỽrth
hẏnẏ y|kauas gỽyr goroec yn eu kyghor ỻuydaỽ yn eu
holl a|cheissaỽ eu kymeỻ y eu keithiwet. ac val yd oed
pandrassus a|e lu yn kyrchu y|diffeith y|tybygynt
vot bruttus yndaỽ. ac val yd oedynt yn mynet heb
laỽ y casteỻ a elwit sparatintus eu kyrchu yn diry+
bud a oruc brutus vdunt a|their mil o|wyr aruaỽc
gantaỽ kanys yn diarỽybot y doeth brutus a hẏnẏ
o|wyr y·gyt ac ef ac eu kyrchu a oruc gỽyr tro
vdunt yn ỽychẏr diafyrdỽl a|ỻad aerua diruaỽr
y|meint onadunt a fo yn gewilydus a oruc pandras+
sus a gỽyr goroec y·gyt ac ef y bob man o|r y tybẏ+
gynt kaffel dianc. a|cheissaỽ mynet drỽy|auon a|oed
gyr eu ỻaỽ sef oed y|henỽ askalon ac y|geissaỽ bryssyaỽ
drỽy yr a·von ẏ periglỽẏs anneirẏf onadunt. a
ỻawer a vodassant. a ỻawer o|r a|diaghei heb eu
bodi a ladei wyr tro ar y glan. ac yn|y wed hono
gỽneuthur deudyblẏc aerua onadunt a gỽedy gỽe+
let o antigonus braỽt pandrassus vrenhin groec
hẏnẏ doluryaỽ a|wnaeth yn vỽy|no meint a galỽ
y|getymdeithon gỽasgaredic attaỽ. ac eu bydinaỽ
ac yn gyflym kyrchu gỽyr tro kanys clotuorach
a|thegach oed gantaỽ y lad gan gyrchu no|e uodi
gan|fo yn hagẏr ac ymlad a|wnaeth ef a|e vydin
yn ỽychyr ac yn ỽraỽl ac ny dygrynoes idaỽ na+
mẏn ychydic. kanys paraỽt oed wyr tro ac eu
harueu yn wisgedic gyweir ymdanadunt. a gỽyr
| « p 26r | p 27r » |