NLW MS. Peniarth 11 – page 228v
Ystoriau Saint Greal
228v
a|e trewis yny vyd blaen y gỽaeỽ drỽy berued y gorff. Ac yny
vyd ynteu yn varỽ y|r ỻaỽr. Y|marchogyon yna a hỽylyassant
y walchmei. eissyoes y·ryngthaỽ efo a|meliot ỽynt a ymdiffer+
assant yn|da. ac y|r casteỻ y|doethant ỽy dan ymlad. ac ỽynt a|
gỽasgassant ỽynt yn|gyn|gyvynget ac y bu reit udunt. wne+
uthur gỽrogaeth y veliot a|roi yr agoryadeu yn|y laỽ. a|gỽedy
daruot y veliot gaffael medyant ar gỽbyl o|e hoỻ|tir. gỽalch+
mei a ymchoelaỽd dra|e|gevyn yn ol arthur a laỽnslot. ac ef
a gyuaruu ac ef morwyn ieuanc dec a|brys maỽr arnei. A|vn+
bennes heb ef duỽ a|rỽydhao ragot ac y|ba|le os da gan duỽ yr ey
di a|r brys hỽnn arnat. Arglỽyd heb hi mi a|af y|r dyrua vỽ+
yaf a weleist eirioet o varchogyon urdolyon. Pa|le y mae hyn+
ny heb·y gỽalchmei. Y mae heb hitheu yn|y ỻannerch dan
y paleis. ac y geissyaỽ y marchaỽc a|r arueu eureit idaỽ
yd af i yno. yr|hỽnn a|enniỻaỽd y kylch|eur yn ymyl y pebyỻ
ac a|wdost di vn chwedyl y ỽrthaỽ ef. A vnbennes heb·y gỽ+
alchmei beth a vynnut ti ac efo. arglỽyd heb hitheu mi a
vynnỽn y welet. kanys mab y wreic wedỽ yr hỽnn a|e hen+
niỻaỽd yn|y vlaen ef. a|m|gyrraỽd i o|e geissyaỽ ef. ac y ado+
lwyn idaỽ o|thosturyaỽd eiryoet ỽrth na gỽreic na morwyn
dosturyaỽ o·honaỽ ỽrth vy arglỽydes i. a|dial ar nabigaỽns
y dwyỻ a|r|dreis a|wnaeth am dwyn y genthi y kylch eur.
a ỻad y marchogyon. A vnbennes heb·y gỽalchmei na la+
uvrya di dim yr hynny. kanys gỽybyd di yn ỻe gỽir mae
y neb a eniỻaỽd y kylch eur neu|araỻ drostaỽ ynteu a|lad+
aỽd nabigaỽns. Arglỽyd heb hi pa|delỽ y gỽdost di hynny.
| « p 228r | p 229r » |