NLW MS. Peniarth 11 – page 43v
Ystoriau Saint Greal
43v
yn ehegyr. Ac ef a|r|aỻei heb ef wneuthur o|duỽ a thydi hynn
yr dy brovi a|th adnabot y edrych beth vydut ae|da ae|drỽc. Ac
yr pan y|th|wnaethpwyt ti yn varchaỽc urdaỽl. ef a|dylyei
dy gallon di vot mor galet ac nat ostyngei hi yr|perigyl byda+
ỽl yma. A challon marchaỽc urdaỽl a|dyly bot yn|ffenedic di+
ymadaỽ ac ef y darestỽng gelyn y arglỽyd. ac ny thry marcha+
ỽc urdaỽl da y geuyn yny darffo o vateil goruot arnaỽ. Ac
ny dyly gadaỽ urdas kymeint a|hỽnnỽ namyn y dỽyn gan+
thaỽ. Ac yna peredur a|ovynnaỽd idaỽ o pa wlat yr|hanoed. ~
Mi a|henwyf heb ef o|wlat bell odyma. Pa ryỽ antur heb y
peredur a|wnaeth y titheu dyuot y wlat mor estronaỽl a honn.
Myn|vyng|cret heb ynteu yr dy gynghori di a|th ganhorthwyaỽ.
ac y warandaỽ dy gyflỽr a|th gyffes o|r mynny y venegi ym.
Ryued heb·y peredur yd|wyt yn|dywedut dy dyuot y|m kynghori j.
ac y|m canhorthỽy. ac ny welaf|i fford y gaỻei hynny vot. kan+
ys ny|wydyat neb vy mot J yma namyn|duỽ e|hun. Peredur ̷
heb ynteu mi a|wydyỽn dy vot ti yma yn hyspys. ac ny wnaeth+
ost yr ys|talym hayach o|weithredoed nys|gỽypỽyf yn|gystal a
thitheu. Ac yna peredur rac mor gymen y clywei y gỽr da. a dy+
nessaaỽd ar vỽrd y ỻong. a|govyn y|r gỽr da a ranghei bod idaỽ
dehongyl breudwyt a|welsei. Dywet yn hy heb y gỽr da. a min+
heu a|e|dehongylaf ytt. Ac yna peredur a|dywaỽt idaỽ cỽbyl yn|y y
mod y gỽelsei heb adaỽ vn geir ual y|mae o|r blaen ~ ~ ~
A C yna y|gỽr a|dywaỽt. peredur heb ef am y|dỽy wraged
a|weleist|di drỽy dy hun. y mae synhwyr maỽr ar|hynny.
Nyt y wreic a|weleist di yn marchogaeth y ỻeỽ. ef a|eỻir y|chy+
| « p 43r | p 44r » |