NLW MS. Peniarth 11 – page 75r

A|phan gyfodassant o·dyno pob vn a|edrychaỽd ar y gilyd. a|r

daear a|oed gỽedy cochi a|ỻosgi yn|eu kylch. A phan weles  bỽrt

y vraỽt yn|didrỽc diolỽch y|duỽ a|oruc. Ac yna ef a glywei lef

yn|dywedut ỽrthaỽ. Bỽrt heb ef marchocka kyntaf ac y geỻych

tu a|r mor. ac na chynnal gedymdeithyas mỽy a|th vraỽt. a|brys+

sya di tu a|r mor yn|y|ỻe y mae peredur y|th aros. Ac yna gostỽng

ar benn y linnyeu a|oruc. a diolỽch y duỽ trỽy wedieu bot yn

wiỽ ganthaỽ y alỽ yn|y wassanaeth. a|gỽedy hynny dyuot att

y vraỽt a|dywedut ỽrthaỽ. lionel heb ef ny buost vwyn am

lad y marchaỽc urdawl a|oed gedymdeith ytt. ac am lad y me+

udwy heuyt. ac yr duỽ na|dos odyma yny darffo eu cladu. Po+

nyt arhoy ditheu hynny heb·y lionel. Nac arhoaf heb ynteu

kanys reit yỽ ym vynet att beredur yssyd y|m aros megys y

dywaỽt y|ỻef ym. Ac yna bỽrt a|gyfodes ac a|roes arwyd y groc

arnaỽ. ac a|esgynnaỽd ar y varch. ac ueỻy kerdet racdaỽ a|oruc

ef y·ny doeth y vanachlaỽc wenn y ỻe y buwyt lawen ỽrthaỽ.

A|r nos honno ac ef yn|kysgu ef a|glywei lef yn dywedut ỽrth+

aỽ. bỽrt kyfot y uyny ac ynteu yna a|gyfodes ac a|wisgaỽd

ymdanaỽ. A gỽedy ym·baratoi yn|y arueu ef a|esgynaỽd ar

vedyr mynet ymeith. a|r pyrth a|oed yn gaeet. ac ynteu a|o+

gylchynnaỽd y kaeroed. yny gafas y mur yn ỻe tyỻic. Ac y+

na ef a|doeth aỻan ac a|uarchockaaỽd yny doeth y ymyl y|mor.

ac yno ef a|arganuv ysgraff a|phebyỻ yndi o samit gỽynn.

ac yna disgynnv a|oruc a mynet y|r ysgraff y myỽn. ac yr

aỽr y|doeth y myỽn ef a|welei yr ysgraff yn kychwyn ymeith.

a|r gỽynt yn taraỽ yn|y hỽyl yn gyn|ffestet. ac y tebygei ef y bot