Breudwd Welsh Prose 1300-1425
Cymraeg

NLW MS. Peniarth 18 – page 54v

Brut y Tywysogion

54v

thic. Ac yn|y kyghor hỽnnỽ y|kymydỽyt rys
ieuanc a llywelyn ap ioruerth. Ac yd edeỽis llywelyn idaỽ abertei+
ui megys y|rodassei gaervyrdin y|vaelgỽn ap
rys. Y|ulỽydyn honno yd aeth llu y|cristonogy+
on o|damiet yn|yr eifft tu a babilon ỽrth ymlad
a|hi. Ac ny|s gadaỽd dial duỽ. canys llifhav a|ỽn+
aeth avon nilus ar y|fford a|e gỽarchae rỽg dỽy
auon yny vodes anneiryf ohonunt. Ac yna y
deuth y|sarascinnyeit vdunt. A|llad llaỽer ona+
dunt. A cheithiaỽ* ereill. Ac yna y|goruu arnunt
talu damiet y|saracinnyeit dracheuen dros y
byỽyt a|e rydit y|keith. Ac gỽneuthur kygreir
ỽyth mlyned ac ỽynt. Ac odyna y|hebrygaỽd y
saracinyeit ỽynt hyt yn acrys lle ny|ỽydit dim y
ỽrth croes crist. namyn trugared duỽ e|hun a|e
talaỽd vdunt. Y|ulỽydyn honno y|kyỽeiraỽd
Jon breỽys castell seinhenyd. drỽy gennat a|ch*+
hygor llywelyn ap ioruerth. Y|ulỽydyn racỽyneb y|bu va+
rỽ rys Jeuanc. Ac y|cladỽyt yn ystratflur ỽedy
kymryt penyt a|chymun. a|chyffes. ac abit y
creuyd ymdanaỽ. A gỽedy hynny y cauas yỽein
ap grufud y vn braỽt rann o|e gyuoeth. a|rann arall
a|rodes llywelyn ap ioruerth y|vaelgỽn ap rys. Y|ulỽydyn
honno y|morỽydaỽd gỽilym marscal iarll pennuro
y|iỽerdon. Y ulỽydyn racỽynep y|deuth gỽillim
marscal o iỽerdon a lluossogrỽyd o varchogyon