Breudwd Welsh Prose 1300-1425
Cymraeg

NLW MS. Peniarth 18 – page 8r

Brut y Tywysogion

8r

ethant hep ỽnneuthur dim ar gyhoed. Ac gỽedy
hynny yd ymhoelaỽd yỽein. Ac nyt y|geredigyaỽn
y|doeth namyn y poỽys. A cheissaỽ anuon kennadev at
y|brenhin a|ỽnaeth. ac ny lyuassaỽd neb arỽein y|genna+
dỽri hyt at y brenhin. Yg|kyfrỽg hynny y|bu anuun+
deb rỽg madaỽc ar freinc o achaỽs y|lledradeu yd oed
y|saesson yn|y ỽneuthur ar|y|tir. Ac odyno yd oedynt
yn gỽneuthur cameu yn erbyn y|brenhin. ac ynn dy+
uot at uadaỽc. Ac yna yd anuones ricart ystiỽart
at uadaỽc y|erchi idaỽ ef talu y|gỽyr a|ỽnaethoed
y|cam y|r brenhin. Ac ynteu a|ỽrthỽynebaỽd hynny. ac
ny|s talaaỽd. Ac ynn gamỽedaỽc hep ỽybot beth a|ỽn+
aei namyn keissaỽ kyueillach gann yoỽein ap ca+
dỽgaỽn a|hynny a gauas. A gỽneuthur hedỽch rỽg
y|rei a|oedynt ynn elynyon kynn o|hynny. Ac ym+
aruoll uch benn creireu a|ỽnaethant hyt na hedy+
chei un ar brenhin hep y gilyd. Ac na uredychei un
o·nadunt y|gylyd. Ac yna y kerdynt ygyt by|le|byn+
nac y|dyckei y|tyghetuen ỽynt. a llosci tref nep vn
ỽrda. a|phy|beth|bynnac a|ellynt y|dỽyn gantunt.
nac ynn ueirch. nac ynn|ỽiscoed a|e ducssant. na neb
dim arall o|r a geffynt. Y ulỽydyn racỽyneb y coffaa+
ỽd henri urenhin carchar Joruerth ap bledyn. ac an+
uon kennat attaỽ y|ỽybot peth a|rodei yr y|ellỽg o|e
garchar. kannys blin yỽ bot ynn hir garchar. Ac
ef a|edeỽis moỽy* noc a|allei y|dyuot idaỽ. A|dyỽedut